కలువ కన్నుల రూపసి..!!

తన తడి పెదవుల విచ్చుకతకు 

సొట్టలు పడే ఆ నును బుగ్గల సిగ్గును

ఏ కవి వర్ణించ గలడు ?

సైగలతోనే  కనికట్టు చేయగల వాగ్దేవి రూపంతో 

మనసుని  మెలితిప్పి సమ్మోహించే 

ఆ  కలువ కళ్ళను ఏ శిల్పి మలచగలడు ?

కనుసొగలతోనే  అల్లరిచేసే 

తన కొంటెతనంలో 

చిలిపిగా నవ్వే ఆ ఎర్రని పెదవంచులలో 

తడిసి ముద్దవ్వాల్సిందే కానీ 

తనని వర్ణించడం, తన రూపాన్ని చిత్రించడం 

ఏ  నరునికి  సాధ్యం ??

తన రాకను తనకన్నా ముందే 

తన దేహ పరిమళం మత్తిల్లి హత్తుకుంటుంది 

తను చెప్పే చిరు గుసగుసల సవ్వడికి 

ఆ పెదవులు కదిలే కలివిడికి 

ఏ మనసైనా  అలజడికి ఆహుతి ఆవ్వాల్సిందే..!!

అదేంటో తను మాట్లాడుతుంటే 

అలానే చూడాలనిపిస్తుంది 

అనురాగ సవ్వడులు వినిపించే…

ఆ హృదయ కోవెలనుంచి 

వెచ్చని తన ఊపిరి నా మెడ వెనుక తాకుతుంటే

మనసంతా, తనువంతా ఓ గిలిగింత..!!

వినీలాకాశంలో విలక్షణమైన సౌందర్యం  తనది.. 

అసంఖ్యాక నక్షత్ర మండలంలో రెప్పలార్పలేని రూపం తనది.. 

సూర్య చంద్రుల్లా ప్రతీక్షణం వెలిగే ఆ నయనాలు, 

సంపెంగ వంటి ఆ సన్నని నాశికాగ్రహం, 

నల్లని ఆకాశంలోని ఓ తారను తెంచి పెట్టుకున్నట్లుగా నుదుటిన లలాటీకము, 

గులాబీ రెక్కల్లా  మృదుమధురమైన ఆ యెర్రెర్రని అధరములు,

నవనీతపు ముద్దల్లా సుతిమెత్తని చెక్కిలి 

పసిడి ఛాయవంటి యవ్వన కాంతిమయ దేహం.

శంఖం లాంటి మెడ 

వెండి తీగలా వున్న సన్నని నడుము.

ఆ స్వరంలో ఉషస్సు, 

ఆ చూపుల్లో యశస్సు, 

కళ్ళతోనే సంభాషించే సమ్మోహనం ..!!

సువాసనతోనే హత్తుకునే సమ్మేళనం..!!

ఓ కలువ కన్నుల చిన్మయి,

నీ గురించే ఆలోచించేలా చేస్తున్నావ్... 

ముఖ్యంగా ఆ చెక్కిలి పై వుండే  రెండు పుట్టుమచ్చలు 

కళ్ళజోడు పెట్టుకున్నానే కానీ 

ఏ స్వాప్నిక ప్రపంచమూ కనిపించడం లేదు..

నిను మొదటిసారి చూసినప్పుడు

ఆ కళ్ళలో ఓ తెలియని అద్భుతాన్ని చూశాను

మంత్రించి విడిచిన మహావాక్యంలా 

నిను అలా చూస్తూ నిస్తేజంగా ఉండిపొయాను 

ఎవరినైనా సమ్మోహనం చెయ్యగల అభినవ రూపసివి..!! 

           ~ ~ త్రిశూల్ ~ ~ 

Mobile: 9032977985

Blog: http://bobbynani.blogspot.com/

Insta: https://www.instagram.com/aniboyinabobby?utm_source=qr

కవి రాయని కవిత...!!

కవి రాయని కవిత..

****************

నా దేశంలో..

మహా రావణకాష్ఠం నడుస్తోంది 

సందు గొందుకు ఓ రావణాసురుడు 

వాడి రణ వేదిక  స్త్రీ మర్మస్థలం..!

అదే వాడి కామ క్రీడా విలాసం..!!

బ్రహ్మ కానీ, బ్రహ్మంగారు కానీ,

వ్యాసుడు కానీ, వాల్మీకి కానీ, 

ఈ రాతను రాసిన దాఖలా లేదు

దీన్ని పైశాచికమందామా 

లేక బలాత్కార సంభోగమందామా..!!

పెన్నూ, జామెంట్రీ బాక్సూ తీసుకొని 

హడావిడిగా ఇంట్లోంచి

అడుగు బయట పెట్టె ఆ చిన్నారిని 

ఎన్ని కామపు కళ్ళు తడుముతాయో 

ఎన్ని అంగాలు లేచి నిక్కబొడుచుకుంటాయో..!!

కడుపులోని ఆడ బిడ్డకే కాదు

పక్కన పడుకున్న పసి పాపను కూడా 

కళ్ళలో వొత్తులేసుకొని కాపాడుకోవాల్సిందే 

ఏ రాత్రివేళ ఏ మృగం అదును చూసి

మీద పడుతుందేమోననే భయం..!

తన కళ్ళు, తన కన్నీళ్ళు ఆకర్లేదు 

రెండు కాళ్ళ మధ్యన మాత్రమే వాడి పనంతా..! 

రెండే రెండు నిమిషాలు కోసం 

పెద్దా, చిన్నా, 

పసి, ముసలి 

వావి, వరుసలు అక్కర్లేదు వాడికి..!!

తను డాక్టర్ అయితే 

ఎంతమందికి చేయూతనిచ్చేదో 

తను ఇంజనీరు అయితే 

పారే నదులపై ఎన్ని వంతెనలు నిర్మించేదో 

తను వకీలు అయితే 

చట్టం చుట్టూ అల్లుకున్న ఎన్ని కల్లగంతల్ని తీసేదో..!!

కానీ రేయ్ 

నువ్వు చేసిన అకృత్యం వల్ల 

తను సర్వం కోల్పోయి 

జీవచ్చవమైంది..!

ఓ నిజం చెప్పనా..

మానవ చరిత్ర పుస్తకం పై 

తనదృష్టిలో నువ్వో చెరగని 

రక్తపు సిరా మరకవి..!!

       ~ ~ త్రిశూల్ ~ ~ 

Mobile: 9032977985

Blog: http://bobbynani.blogspot.com/

Insta: https://www.instagram.com/aniboyinabobby?utm_source=qr

అలౌకిక భావాలు...

 

నా లోని భావాలు ఇవాళ చాలానే చెప్పాలోయ్ నీకు 

నిను చూసిన  ఆ క్షణం నుంచి మనసులో ఎన్ని భావాలను దాచుకున్నానో .. నీకు తెలియదు ..

వాటిని  అలా  దాచి దాచి మనసంతా బోలెడు బరువైపోయింది..

చదివిన తరువాత 

ఆ ఎర్ర మూతి, మరి కాస్త ఎర్రబడి కోపమొస్తే నన్ను క్షమించు..!! 

సరే చెప్తున్నాఇక  నా కోసం వింటావు కదూ..!!

అలౌకిక  భావాలు

***************

అగరు దూపము నిండిన ఓ … సు ప్రభాత వేళ

అద్వైత్వపు మయూరము పురివిప్పియాడు రీతిగ

మంచుబిందువుల ముసుగులో మల్లెపూవువోలె..

మదన పంచమి చినుకుల్లో చిగురుటాకు వోలె..

పున్నమి చంద్రిక తరంగాలుప్పొంగు ఆత్మీయ ధనూషము వోలె.. 

రమా రామణీయత్వపు జీరాడు కుచ్చిళ్ళు పారాడు వేళ

తనువొక మందారమై మనసొక విహంగమై  నీవు నర్తించు సమయాన

నే  చూస్తున్నా నీ  రెండు విశాల నేత్రాల మధ్యన నిజమైన సూర్యోదయాన్ని !!

నువ్వెప్పుడూ నాకు ప్రత్యేకమే

ఎందుకో తెలుసా ? 

నీలో నీకే 

తెలియని ఎన్నో అలౌకిక  భావాలను నేను చూస్తుంటాను

ఆడించే అల్లరితనం 

లాలించే అమ్మతనం

కవ్వించే కొంటెతనం  

మురిపించే జాణతనం

ప్రేమించే సహజతనం

జన్మతః నీలో ఏర్పడిన పంచ ధాతువులివి..!!

ఓ " వీణ " సైతం 

పలికించలేని కోటానుకోట్ల భావాలను 

భావోద్వేగాలను  రస రమ్యమైన  నీ లోని స్త్రీ తత్త్వం  

అత్యంత మధురంగా సునాయాసంగా సృశించగలదు

బ్రహ్మకాలమున పుష్పించే ఓ పుష్పం 

ఎన్ని పరిణామాలను మార్పులను

అదిగమిస్తుందో నీ హృదయం కూడా 

అంతకు మించిన భావ ప్రకంపనలను 

రస స్పందనలను కలిగి ఉంటుంది.

చల్లని సాయం సంధ్యా వేళలలో

మట్టి వాసనలలో

గుబురు కొమ్మలలో

చిరు జల్లులలో

ప్రకృతి ఒడిలో

ముఖ్యంగా దీపపు ప్రమిద కాంతులలో

నీ దేహపు సున్నుపిండి వాసనలలో

మేలిమి మీగడ చందనాలలో

మధుర పట్టు పరిమళాలలో

ఇలా నీకే తెలియని ఎనేన్నో అసంఖ్యాక భావాలతో, 

అలౌకిక రాగాలతో, అణువణువు అంగాంగమూ 

ఓ సుందరమైన రాగాన్ని బట్టి, 

ప్రేమించే హృదయాన్ని బట్టి 

పైపైకి ఉప్పొంగుతూ  

తనువూ మనసూ పురివిప్పిన 

శ్వేత మధుకమువోలె నా కంటికి కనిపిస్తుంటావు..!!

నా కనురెప్పలకు 

ఆశల నక్షత్రాలను కొవ్వొత్తులుగా 

అమర్చుకుని మరీ చూస్తున్నాను

నూతనాకాశాల నీడన 

పుష్పించు దివ్య కుసుమములా 

తళుక్కున అలరించావు

వినీలాకాశపు వీధుల్లో 

విహరించు గంధర్వ కన్య లా ఉదయించావు !!

నీ 

పెదవంచుల్లో మొదలైన చిలిపి గాలి 

నా చెవుల్ని సవరిస్తూ వయ్యారాలు పోతుంటుంది 

నీ 

మెడవంపుల్లో  ఉదయించిన ఓ పరిమళం 

నా నాసికను రాసుకుంటూ   సమ్మోహనం చేస్తుంటుంది 

నీ 

దేహానికి తాకిన తియ్యని తేనె సొన

నా ముఖానికి మధురంగా పులుముతుంటుంది..!!

నాలో ఇంత భావుకత ఉబికిందంటే 

ఖచ్చితంగా 

అది నీ  మానసపు నవనీత కాంతులే..!!

నా మనసులో నీ స్థానం ఏంటో నీకు తెలుసా?

క్షీరములో నవనీతపు సోయగం

పువ్వారులో పుప్పొడి చందనం

మధువు లో మధురిమల పరిమళం 

ఝుంఝూమారుత ఝర్ఘరీయధ్వనులు  

జముకు జముకు అలలై, ఎగసే 

లయల కెరటాల రీతి నర్తించు నీ  పాద పద్మాలను 

ఒకే ఒక్క క్షణం నా విభ్రమ నేత్రాలతో కన్నులారా కాంచిన చాలు కదా..!! 

ఈ కాస్త జీవితానికి..!! సరిపడేంత జ్ఞాపకాలు పోగేసుకోవడానికి..!!

ఏమంటావ్?                 

            ~ ~ త్రిశూల్ ~ ~ 

Mobile: 9032977985

Blog: http://bobbynani.blogspot.com/

Insta: https://www.instagram.com/aniboyinabobby?utm_source=qr

నిశిలో శశి...

 

ఈ సృష్టిలో ప్రతిదీ అద్భుతమే.. నువ్వు మనసారా చూడగలగాలి అంతే…

ఈమె ఎవరో అప్పుడే పూచిన తంగేడు పువ్వులా అనిపించింది నాకు … అందుకే చిరు అక్షర నిరాజనం..

ఒక స్త్రీ లో మాతృత్వం మాత్రమే కాదు దాతృత్వం, రసికత్వం, ఇలా సప్త గుణ ధాతువులు వుంటాయి.. అలా ఉన్న స్త్రీ ఎవరైనా సరే ఆమె దేవతా స్వరూపమే..!

నిశిలో శశి
**********

తన
కన్నులు మాట్లాడే
కలువ భాషను
ఏ చరిత్రకారుడు వ్రాయగలడు..!
ఏ  చిత్రకర్ముడు గీయగలడు..!

అచెంచల కమలా మృద్వీయ  తన  సొంపును జూడ,
రాజీవగంధి యస్యా స్సౌరభవ తన సొబగును జూడ,
ధవళ కుసుమా వాసిత త్రివళ లలిత కళంకిత..!
నీలి వర్ణ పరిమళ మన్మంద హాసినీ విలాసిత..!
చంద్రకాంతి మయమగు ముఖస్యోభిత వదనిత..!
గాండీవమ్ముల పూబోణి కనుసోగల మకిలిత..!
సౌందర్య విలాస విభ్రమాది సౌశీల్యంబుల మాలిన్యత..!
శృంగార లీలా వినోదా లస లాలిత్య సమ్మోహనా  నిశిత..! సమ్మోహిత..! మా మనస్తిత..!!
ఇలాంటి మాటలు ఎన్ని రాసిన తన ముందు సరితూగవేమో..!!
కారణం ఏంటో తెలుసా ?
ఒకపక్క
ఉత్తరపు దిక్కు
మలయమారుతం
మరోపక్క
కార్తీక మాసపు చలి కౌగిలి
రెండూ  కలగలిపిన నిశిలో శశి తాను..!!

ప్రభాత వేళ లలితోద్యాన పిక,శుకాలాపములతో
ప్రతిధ్వనించు తన  గంధర్వ కంఠ మాధుర్యంబులు
మిన్నులతో రాయు సువర్ణ సౌధరాజములతో
ప్రకాశించు తన విశ్వంకరములు
శృంగార నారీకేళ ఫల వృక్ష నివహములతో విరాజిల్లు
తన దేహ శృంగారంగంబులు
చైత్రరథమును మించు  నీలవేణి దేహ
రమణీయోద్యానమ్ములు 
దివ్య ప్రబంధయుగాస్యములగు
ముదితనితంబి నీరజన చతుర విలాసోక్తులు
రమణీయ మధుర సుగంధ పుటరటులతో,
లేత చివురు పాదాల అందియలు మ్రోగు
ఘంటా నినాద  పటపటాత్కార క్రేంకారములతో
తన ఆపాద మస్తకం ఓ అందాల శైవాలము..!!

Written by : Bobby Aniboyina 
Mobile: 9032977985

Blog: http://bobbynani.blogspot.com/
Insta: https://www.instagram.com/aniboyinabobby?utm_source=qr

ఆమె కౌగిలి ..

భార్య భర్తలు అంటేనే ఈ రోజుల్లో ఓ కామెడీ అయిపోయింది. ఆ బంధానికి విలువ ఇవ్వకపోగా అపహాస్యం చేస్తున్నారు అంటే బంధాల విలువ వారికి తెలియదు అనే అర్ధం. అన్ని బంధాలు గొప్పవే వాటికన్నా గొప్పది భార్య భర్తల బంధం.. వేరు వేరు ప్రాంతాల వారు, వేర్వేరు అభిరుచుల వారు, వేరే వేరే మనస్తత్వం కలిగిన ఇద్దరు వ్యక్తులు ఒకే గదిలో వుంటున్నారు అంటే కనిపించేంత సులువైన విషయం కాదది.

ఆలుమగలు అంటే రెండు శరీరాలే కాదు..

రెండు మనసులు కూడా

పూర్తిగా ఒకరికొకరు చదివిన పుస్తకం లా తెలుసుకొని వుండాలి..!!

రెండు శరీరాలు ఏకమై

రెండు మనసులతో ఒకే పుస్తకమై

తొమ్మిది రసాలను సిరాగా చేసి

ఏక కలంతో రాసుకునే రంగులమయ జీవితం వారిది..!!

భార్య అనే ఆలయానికి

అలసి పయనించే యాత్రికుడు భర్త..

సజ్జనుడికి స్వర్గధామం భార్య...

సృష్టికర్త వ్రాసిన బంగారు చిత్రపటం భార్య,

భర్తే పరికించ గలడు..

దేవుడిచ్చిన మణిమాల భార్య,

భర్తే ధరించగలడు ..

స్వర్ణలిఖితం భార్య,

భర్తే పఠించగలడు ..

అందుకే యెంతటి వాడైనా కాంత దాసుడే అని అందరూ అంటుంటారు.. “కాంత”కు “దాసీ” అనేది పక్కన పెడితే ఆ కాంతే అన్నీ తనకు అని భావించే భర్తలు లేకపోలేదు. ఉదయం నుంచి అలసి శ్రమించిన భర్త సంధ్యాస్తమ సమయానికి ఇంటికెళ్ళి ఆ కోమలాంగి ఎదపై సేదతీరే ఓ మధుర భావన ఇది. ప్రతీ భర్త ఇంటికి వెళ్ళాక తన అర్ధాంగిపై వాలి తనతో ఎన్నో పంచుకోవాలని తపనపడతాడు.. కాని ఎన్నో అడ్డంకులు .. వాటిని అన్నింటిని పక్కన పెట్టి అలా కౌగిలిని ఆనందించే వారు నేటి కాలంలో అరుదు.. అలాంటి అరుదైన పరిణాయకులకు నా ఈ “కౌగిలి” కవిత అందజేస్తూ ...

ఆమె కౌగిలి ..

***********

ప్రాపంచిక బాధల్ని మైమరిపించే

మహాదానందముంది ఆమె కౌగిలిలో..

మలినబుద్దులన్నీ అనిగిపోయి

నిశ్చింత మాత్రమే అనుభూతి పర్చుకుంటుంది ఆమె కౌగిలిలో..

ఎన్నోసార్లు నా పగిలిన దుఃఖాలన్నీ నా మెడ వంపునే ప్రవహించాయి..

లే లేత కుసుమాలు గుచ్చుకునే ఆ ఎద మంచంపైనే

నా చంపల వ్యధలన్నీ తేరుకున్నది.. !!

ఏమీలేని ప్రపంచంలో హఠాత్తుగా

ఒక రోదన లేని ప్రత్యక్ష ప్రదేశం లభ్యమైనట్లు నా కనిపించింది .. ఆమె కౌగిలిలో...

ఇంకెక్కడా లేని నిర్భయపు స్థలం

ఆ కోమలమైన చేతుల్లోనే నిక్షిప్తమైవుంది...

మనసంటూ వున్నా..

మరీ ఇంత స్వచ్చంగా ప్రేమిస్తారా..!! నన్నెవరన్నా .. !!

మీ నుంచి జన్మించినా ..

తిరిగి నన్ను పిల్లాడిని చేస్తారా ఎవరైనా ... ఒక్క ఆమె స్పర్శ తప్ప.. !!

నా జీవన పరితాపాన్ని తొలగించి,

నా స్వాప్నిక కాలాన్ని పరిశుభ్రం చేసి,

నా దుఃఖిత భయవిహ్వాల సమయాన్ని చేత్తో తీసిపారేసి,

నా కళ్ళని ఆనందాలతో మెరిపిస్తాదా ... !! ఒక్క ఆమె తప్ప.. !!

ఆమె కౌగిట్లో విసుగులేని మాతృత్వం విస్త్రుతమై వుంటుంది..

నన్నెవరన్నా ఇలా హత్తుకున్నారా ఎప్పుడైనా ??

వ్యధా, వేదనలు చెదిరిపోయేలా... నా తల నిమిరారా ఎవరైనా ??

అమ్మా, నాన్నలు ఒక్కళ్లే అయి ... నా కళ్ళు తుడిచారా ??

అయిదేళ్ళ బాల్యాన్ని ఆమె అమ్మకు ఆపాదించి...

విరిగిపోయిన తల్లి ఆవేదనల్ని ఎదిగిన ప్రేమమూర్తిలా

ఆమె లే లేత చుంబనాలలో బాధల్ని ప్రక్షాలించింది..

నా మనసంతా తీసి ఆమె మెడలో వేళ్ళాడదీసినట్లు

ఆమె చేతుల్లోకి నన్ను లాక్కొని, కౌగిలించుకొని

నా తలను తనకానించుకొని

తిరిగి తిరిగి నన్ను కస్టాల్నుంచి పునర్జీవింపజేసింది ఆమె కౌగిలి..!

అవును మరి ఆమె కౌగిట్లో,

కోటి జీవితాలకు సరిపడా నిశ్చింత శాంతి సోపాలున్నాయి.. !

అందుకే ఆమె కౌగిళ్ళలో నా ప్రాపంచిక బాధల్ని గప్చిప్గా మర్చిపోతున్నాను..!!

Written by: Bobby Aniboyina

Mobile: 9032977985

Blog: http://bobbynani.blogspot.com/

Insta: https://www.instagram.com/aniboyinabobby?utm_source=qr

ఇదిగో అమ్మాయిలూ మీకే చెప్తున్నా యాద్ ఉంచుకోండి...!!

 

ఇదిగో
అమ్మాయిలూ మీకే చెప్తున్నా యాద్ ఉంచుకోండి...!!

మన మార్కెట్లోకి కొత్త కొత్త ఆర్టిఫిషియల్ ఇంటలిజెన్స్ (AI) యాప్స్ చాలా అంటే చాలా వచ్చి ఉన్నాయి.. కొందరు ప్రీమియం కట్టి మరీ వాటిని తెగ వాడేస్తున్నారు.. ఇక్కడ వరకు అంతా బానే ఉంది..

వాళ్ళు ఎలా వాడుతున్నారు అనేదే చాలా ముఖ్యం

మీరు సోషల్ మీడియాలో పెట్టే ఫోటో ఏదీ సేఫ్ కాదు ఇది గుర్తుంచుకోండి.. మీరు గుడికి వెళ్లి అక్కడ ఫోటో తీసుకొని పెట్టిన కూడా ఈ ఆర్టిఫిషియల్ ఇంటెలిజెన్స్ యాప్ ద్వారా పబ్బులో ఉన్నట్లు సగం సగం బట్టలు వేసుకున్నట్లు.. ఒక్కోసారి ఏమీ లేకుండా కూడా చాలా ఈజీగా క్రియేట్ చేస్తున్నారు.. అంతెందుకు ఈ టూల్ ద్వారా న్యూడ్ వీడియోస్ కి కూడా మీ ఫేస్ తీసుకొని చాలా ఈసీ గా క్రియేట్ చేస్తున్నారు..

ఇలా మీ వాళ్ళు ఎవరైనా చూస్తే ఖచ్చితంగా మీరే అనుకొని పొరపడే అవకాశాలు చాలా ఎక్కువగా ఉన్నాయి.. దాని ద్వారా కొన్ని జీవితాలు కూడా కోల్పోవచ్చు.. మీలో ఒకడిగా మీ కుటుంబ సభ్యునిగా చెప్తున్నాను.. దయచేసి ఎలాంటి ఫోటోలు సోషల్ మీడియాలో పెట్టొద్దు.. ఎవరిని నమ్మి మీ ఫోటోలు షేర్ చేయొద్దు..!!

ఇక్కడ ఎవరు కరెక్ట్ గా లేరు

ఒకప్పుడు హ్యాకర్స్ కి భయపడే వాళ్ళం.. ఇప్పుడు వాళ్లను కూడా శాసిస్తున్నది ఆర్టిఫిషియల్ ఇంటలిజెన్స్.. రేపటి తరానికి ఇది ఒక మాయని మచ్చ నా దృష్టిలో.. ఎందుకంటే ఇందులో మంచి కన్నా చెడే ఎక్కువగా ఉంది..!

కొన్ని రోజులుగా చాలామంది వాళ్ళ వాళ్ళ ఫొటోస్ ని వేరే వేరే బాడీలతో ఈ ఆర్టిఫిషియల్ ఇంటెలిజెన్స్ ద్వారా పెట్టుకొని చాలా సంబరపడిపోతున్నారు.. ఈ సరదా ఇక్కడ వరకు ఉంటే బాగుంటుంది.. ఇది చాలా బేసిక్ మోడల్.. ఇప్పుడు దీనికి చాలా అడ్వాన్స్డ్ టూల్స్ వచ్చి ఉన్నాయి.. ఆడపిల్లలు కొంచెం జాగ్రత్తగా ఉండండి మా..!!

సరదా సరదా లాగే ఉంటే బాగుంటుంది అది కుటుంబంలో దుఃఖాన్ని కలిగించే లాగా ఉండకూడదు..

కొంచెం జాగ్రత్త వహించండి..

Written by: Aniboyina Bobby
Mobile: 9032977985

శ్వేత మధుకము (White Peacock)

 

ప్రకృతి తత్వాన్ని, స్త్రీ అంతరంగాన్ని ఎప్పటికప్పుడు గమనిస్తూనే ఉండాలి. వాటికి తగ్గట్లు మనల్ని మనం అన్వయించుకుంటూ ఉండాలి. రెండిటిలో ఏది వికటించినా అది  ప్రళయమే అవుతుంది. అందుకే అంతర్ముఖుడనై సంధిస్తున్నానిదిగో ఉత్ప్రేక్ష, రస, భావ త్రిపుట కవిత్వాలను మేళవింపుగా..!!

సుదతి సౌమ్య సంధ్యారుణ వర్ణితం

ముదిత సౌమ్య మాధుర్య రస శోభితం

పడతి సౌమ్య సౌదామినీ వద కేతనం

వనిత సౌమ్య తాంబూల సుమ చర్వణం !!

 అనిర్వచనీయమైన ఓ  అందాన్ని చూసినప్పుడు  ఒక కవి హృదయం సహజ సిద్ధంగానే ఉప్పొంగి, పరవళ్ళు తొక్కటమనేది పరిపాటే.. అలాంటి ఓ శుభ తరుణంలో చిత్తరువు పై రాలిన కొన్ని అక్షర సుమాలివి.. చదివి అభిప్రాయం చెప్పాలి మరి..!!

 

శ్వేత మధుకము (White Peacock)

*************************

తనని  మొదటిసారి చూసింది నీలవర్ణపు వస్త్రధారణలోనే ..

ఏమి లావణ్యమో..!

ఎంతటి సౌందర్య ఉద్దీపనమో ...!!

చూడగానే  ఓ దైవిక అనుభూతిని కలిగించింది.

చూస్తూన్నంత సేపు ఎంతో  ప్రశాంతత

మాట్లాడుతూన్నంత సేపూ  ఏదో తెలియని గొప్ప అనుభూతి .. !!

 

తన చూపుల్లోని  ఆధ్యాత్మికత

తన వదనములోని అమాయకత

తన కులుకుల్లోని వయ్యారములు

తన ధాతువుల్లోని ప్రకాశములు

తన పెదవంచుల్లోని  చిలిపి నవ్వులు

తన పాదద్వయముల్లోని లత్తుక శోభలు 

ఏ "కవి" వర్ణించగలడు..!!

 

ధనుస్సు లోని "ధనూష" మును

సూర్యుని లోని "రేతస్సు" ను

పున్నమి లోని "వెన్నెల" రజనును

క్షీరము లోని  "మధురిమ" ను

పుణికిపుచ్చుకున్న "శ్వేత మధుకము" తాను ..!!

 

ఎన్ని జన్మల తపస్సు  చేసుంటాడో ఆ బ్రహ్మ

తన దైవీక ఉలినుంచి  తగు మెళుకువలు నేర్చి

రసరమ్య మగు ఈ "అంగన"ను మలచడానికి ..!!

ఎన్ని కులుకులు నేర్పించి ఉంటాడో ఆ అంగజుడు

తన నఖశిఖ పర్యంతము నవనీత నడుమొంపుల

మిసి మిసిల మెరుపులకు, కులుకు సింగారాలు పొదగడానికి ..!!

 

ఎవరు తాను ?

నింగికి నీలిమనా

లేక

పరువానికి ప్రణయినినా ..!!

అదేంటో

తన రాకను తనకన్నా ముందు

తన దేహ పరిమళం ఇట్టే చెప్పేస్తుంది..!!

తానెప్పుడూ విచ్చుకున్న పద్మము లా,

చిరునవ్వు మోము తో .. వెన్నెల కాంతివోలె  ఉంటుంది..!!

ముంగురులేమో ఊగే మేఘాలవలె,

నెమలి పింఛములవలె ఉంటాయి ..!!

ఆ కనుబొమ్మలు చూడు గాండీవములా

ఎలా  వంగి, చూపుల శరములను ఎక్కుపెట్టి

నేరుగా  హృదయానికి సంధిస్తున్నాయో ..!!

ఆ నేత్రాలు చూడు తెల్లతామర రెక్కలను

నల్ల కలువ రేకులను కలగలుపుకొని

లేడి కన్నులను ధిక్కరించుచునట్లున్నాయి..!!

ఆ నాశిక చూడు సంపంగి మొగ్గవలె,

కాడికి కట్టిన నాగలివలె

మదిని దోచేందుకు  ఎలా సిద్దముగా ఉందొ..!!

ఆ అధరములు చూడు దోర దొండ పండ్లలా,

అమృత రసాన్ని ఎలా స్రవిస్తున్నాయో..!!

ఆ  కంఠం చూడు శంఖంలా..

సంపంగి చెట్టు కాండంలా ఎంత అందంగా వుందో..!!

 

తన తనువు లోని అణువణువూ ఓ  అద్భుతమే..!

తన ఆపాదమస్తకమూ ఓ అజరామరమే..!

 

స్తనములు పూర్ణకుంభములవోలె 

నడుం మడతలు తరంగములవోలె

నాభీయము తామర మొగ్గవోలె

పిక్కలు బంగారు సన్నాయివోలె

పాద పద్మమ్ములు పద్మాలవోలె

ముంజేతి మునివేళ్ళు లేత చివుర్లవోలె

తనలోని ప్రతీది ప్రతిభాసమాయములే..!!

 

ఆమె సౌందర్యాతిశయాన్ని చూస్తే

మానవ మాత్రులే కాదు..

దేవాదిదేవతలు సైతం ముగ్ధులై ముడుచుకుపోతారు.. !!

శుద్ధ సువర్ణచ్చాయ గల ఆ దేహం,

ఆ రూపురేఖా విలాసాలు,

కిన్నెర కాంతలను తల తన్నే విధంగా వున్నాయి.. !!

 

అందుకే

నిజంగానే తానొక అద్బుత క్షేత్రం,

తనది అరుదైన స్త్రీ తత్త్వం..!!

 

Written by: Bobby Aniboyina

Mobile: 9032977985

Insta: https://www.instagram.com/aniboyinabobby?utm_source=qr

Blog : http://bobbynani.blogspot.com/

వర్షం వెలసిన ఓ సాయంత్రం ...

 

కొన్ని అనుభూతులకు మాటలుండవబ్బా గప్చిప్గా అనుభవించాల్సిందే .. అలాంటి వాటిల్లో ఓ దృశ్యం ..!! అప్పుడే వర్షఋతువు ముగిసి శరదృతువు మొదలౌతూవుంది తల్లి ఒడిలో పాలుతాగే పసి పిల్లాడిలా పశ్చిమ కనుమల్లో ఒదుగుతున్నాడు నారింజ సూరీడు ..!! గాలిపటం ఎగరేసే పిల్లాడు ఆకాశాన్ని అందుకున్నట్లుగా ఎంత సంబరపడి పోతున్నాడో ఎన్ని కేరింతలు కొడుతున్నాడో..!! దుమ్ముకూడా ఎగరని నిర్లిప్తమైన ఓ ప్రశాంతతని పాకుతూ ఆవరిస్తున్న చీకటి మెల్లిగా చెరిపెయ్యడం చూస్తున్నాను ..!! కొన్ని చూడటం సరిపోదు.. కానీ చూసినంత మేర ఆ ప్రపంచాన్ని మన ప్రపంచంగా మార్చేసుకోవాలంతే..!! పిల్ల తెమ్మెరకు పులకరించిన మేఘం అప్పుడే చినుకులు రాల్చి పోయింది రోమాలు నిక్కపొడిచేలా చలిగాడ్పులు మొదలయ్యాయి..!! ఆశ్వీయుజ చవితి రోజున కూడా వెన్నెల ఎందుకో చాలా ప్రకాశవంతంగా కనిపిస్తుంది..!! పొద్దున ఎంతో అందంగా వికసించిన పుష్పం కళ్ళముందే నిర్జీవంగా రాలడం నే చూస్తున్నా..!! నేను చెప్పాలనుకున్న మాటలన్నీ గాలి తెమ్మెరలు నాతో ఊసులాడిపోతున్నాయి.. ఎందుకో ఈ అస్తమయపు కొండగాలి హృదయాన్ని కోతపెడుతోంది ..!! వీధిలోని ఇంటి తలుపులన్నీ ఒక్కొక్కటిగా మూతపడుతున్నాయి దీపాల వెలుగులు మెల్లిగా కాంతులిడుతున్నాయి ..!! పొద్దున రావాల్సిన ఉత్తరం కోసం నేనింకా ఎదురుచూస్తూనే వున్నాను.. నాకు తారసపడ్డ ఈ ఏకాంత క్షణాలలో గడచిన ఎన్నో సాయంకాలాలు గప్చిప్గా కరిగిపోయాయి..!! కాలం ముందుకు వెళ్తున్నట్లే ఉంటుంది కానీ మళ్ళి మళ్ళి మనల్ని వెనక్కు తీసుకెళ్తుంటుంది..!! Written by: Bobby Aniboyina Mobile: 9032977985 Insta: https://www.instagram.com/aniboyinabobby?utm_source=qr

ఎంత కష్టమే లలన నిను చేరాలంటే....

అమ్మవారి మీద సంస్కృత పదాలతో కొన్ని పాటలు రాసాను. అలానే శాడ్ సాంగ్స్ కొన్ని, మెలోడీస్ కొన్ని, ఫోక్ సాంగ్స్ కొన్ని రాసున్నాను కానీ ప్రాచీన గ్రాంధిక సరళిలో మేళవించి రాసిన "పాట" ఇది.. కొంచం పదాలు తికమక పెట్టి మిమల్ని ఉక్కిరిబిక్కిరి చేస్తాయి. కానీ చాలా లోతైన అర్ధాలతో, భావాలతో సాగుతుంది ఈ పాట. ఆసక్తి కలవారు ఎవరన్నా రాగం కట్టగలరేమో ప్రయత్నించండి మీకోసం ఇన్బాక్స్ లో ఎదురుచూస్తుంటాను ... దాని గురించి అక్కడ మాట్లాడుకుందాం..

ఎంత కష్టమే లలన నిను చేరాలంటే ఎలా అయినా వచ్చి నిను చేరాలంతే..!! మేఘాల వీవనలతో చెమర్చిన మొహనాన్నే తడమనా మంచు బిందువులు నీ పెదవిపై వచ్చి వాలే లోగా ..! తళుక్కున వేళ్ళాడే నెలవంక చిరునవ్వును తెంచివ్వనా వెన్నెల విరి మోము ఆడి.. ఆడి అలసి వాడే లోగా..! రెక్కలాడిస్తూ చెప్పే గుసగుసల గోరింకను పట్టివ్వనా చిటారు కొమ్మమీంచి చిట్టచివరి ఆకు రాలే లోగా.. ఎలా అయినా వచ్చి నిను చేరాలంతే..!! ఎంత కష్టమే లలన నిను చేరాలంటే మనోఫలకముపై శీతల పవనాలు ఉత్తుంగ తరంగములై ప్రేరేపించే వేళా..! శ్రవణములకు పక్షుల కిలకిలారావాలు స్వర జతులై ఉత్తేజితం చేసే వేళా..! నీ కాలి మువ్వ రాల్చిన మెరుపు రజనునై నే తానా..లాడు వేళా..! నిలకడ వదలిన నీ మునివేళ్ళను మునిమాపు వేళల్లో, సందెప్రొద్దు సూరీడు కోరికోరి గోముగా ముద్దాడి వెళ్ళేలోగా కలవిడిచి.. ఇలనైనా నిను చేరాలంతే..!! ఎంత కష్టమే లలన నిను చేరాలంటే ఎలా అయినా వచ్చి నిను చేరాలంతే..!! వర్షంలా వచ్చావు నాపైకి వాగులా పయనించావు నాలోకి దాహమైనా తీరలేదే ..నాపై ఓ వలపు చినుకైనా పడలేదే..! నీ నీలి మేఘాల మధ్య మెరుపులా మాయమైనావు పిడుగులా నను బాధించినావు.!! ఎంత కష్టమే లలన నిను చేరాలంటే ఎలా అయినా వచ్చి నిను చేరాలంతే..!! నా తీరంలా నువ్వు నర్తిస్తుంటే మెల్లగ నిను ముద్దాడే తరంగమై.. నే.. సేద తీరాలంతే.. నా జీవన ఉచ్వాస నను వీడే లోగా వెచ్చని ఆవిర్లు విరజిమ్మే నా గుండె చప్పుడు ఆగే లోగా.. నిను చేరాలంతే..!! నిను ఆర్తిగా హత్తుకోవాలంతే..!! నీ వలపు వాకిట ఒడిలో బిర బిరా వచ్చి చేరాలంతే తుమ్మెదనై వచ్చి నీ అధరాలపై అలసి వాలాలంతే..!! ఎంత కష్టమే లలన నిను చేరాలంటే ఎలా అయినా వచ్చి నిను చేరుతానంతే..!! Lyrics: Aniboyina Bobby Mobile: 9032977985

ఏకాంత కావ్యం...

ఓ
ఐదు పదులు
దాటుంటాఏమో ఆమెకు..!
ఎన్ని  అల్లర్లను
దిగమింగుకుందో
ఎన్ని నవ్వులను
దాచుకుందో
పైకి కఱకుగా కనిపిస్తూ
అందరిముందు
ఎన్నేళ్ళుగా నటిస్తుందో ఏమో.. !!
 
ఎవ్వరూ లేని
ఏకాంత సమయాల్లోనే
చూడాలి ఆమెను.. !
అద్దం ముందు తనని తాను
చూసుకుంటూ మురిసిపోతూ
విచ్చుకునే ఆ పెదవంచుల్లోని
చిలిపితనాన్ని,
కళ్ళకు కాటుకదిద్ది
పువ్వులా వికసించిన ఆ మోముకు
అరచేయి అడ్డుపెట్టి
చూసుకునే అల్లరితనాన్ని,
ఏ చరిత్రకారుడు చూడగలడు
ఏ కృతికర్త వ్రాయగలడు..!!
 
మట్టిగాజులంటే ఎంత ప్రేమో
స్వయానా కోసిన పూలు
అల్లుకోవడం అంటే ఎంత మక్కువో
పోపు డబ్బాలో దాచుకున్న
పటికబెల్లం చీక్కుంటూ
చిన్నపిల్లలా పెరటిలో
ప్రతీ  మొక్కనూ పలకరించడం
ఎంత ఇష్టమో..!!
 
చల్లని సాయం  సంధ్యా వేళలో
చిరుజల్లుల మట్టి వాసనలలో
ఆమె తనువొక  ఇంద్రధనువై
ప్రకృతి ఒడిలో ఆటలాడటం
మరెంత ఇష్టమో  .. !
 
దీపపు ప్రమిద కాంతులలో
అప్పుడే ముడతలు పడే ఆ మోము 
నీటి బిందువులతో మెరిసే
గులాబీ లా ఎంత అందంగా,
మధురంగా ఉంటుందో,
శారీరకంగా, మానసికంగా,
మధురోహలతో తన్మయించే
ఆమెలోని స్త్రీ తత్వం కూడా
అంతే అందంగా,
అంతే మధురంగా,
మరంతే హుందాగా
విలసిల్లుతూ కనిపిస్తుంది..!
 
ఆమెకు కావాల్సిందల్లా
మనసైనవాడు కబుర్లాడుతూ
కూర్చునే సాయంత్రాలు.. !
అరచేతుల్లోకి ఆమె ముఖాన్ని తీసుకొని
కళ్ళు చూస్తూ మనసును  చదివే సహచరుడు
కన్నులు కార్చే కన్నీటిని తుడుస్తూ
చొరవగా  దగ్గరకు లాక్కుని
ధైర్యం చెప్పే కాంతుడు
అన్నిటికన్నా ఆమెకంటూ
సమయాన్ని కేటాయించే రమణుడు
ఇది కదా ఏ స్త్రీ అయినా కోరుకునేది..!!
అలా కుదరనప్పుడే
తానో ఏకాంత  కావ్యమై ఇలా
మనముందు గప్చిప్గా
నిల్చుండిపోతుంది..!!
 
Written by: Bobby Aniboyina
Mobile: 9032977985

Insta : https://www.instagram.com/aniboyinabobby?utm_source=qr

 

అభినవ సత్యభామ...

ప్రణయమూ తానె 

ప్రళయమూ తానె 

విదగ్ధ తానె 

విధ్వంశి తానె 

సత్యనిత్యాన్వేషణలో 

తానెప్పుడూ పురివిప్పిన శ్వేత మధుకమే..!! 

ఏ రసోద్భవ సన్నివేశంలో జన్మించినదో 

ఏ సరసుడూ, 

ఏ రసికుడూ, 

ఏ కవీ, 

తమ తమ అర్ధనిమీలిత నేత్రాలతో వీక్షించినా, 

తన్మయత్వ హృదయములతో పలికించినా, 

అభివర్ణించలేని లావణ్యము తనది. 

ఒక కంటిన సరసమునూ, 

మరు కంటిన సమరమునూ,

ఏక కాలమున పండించగల వాగ్దేవి తాను..!!

యీమె 

విరహిణి కాదు, 

ముగ్దా కాదు, 

రస రమ్య అలంకారముతో నున్న

వాసవసజ్జిక, ప్రౌఢ, శాస్త్రకోవిద, 

కళాచతుర్విధ కూడా  కాదు.. 

వారికన్నా గొప్పగా గాండీవమును ఎక్కుపెట్టి 

కదనరంగమున కత్తి దూయగల  

అభినవ సత్య తాను...!

కళ్ళతో కాదబ్బా 

మనోనేత్రంతో చూడాలంతే 

గోధూళి వేళన 

కేరింతలు కొట్టే పసి పిల్లలా కనిపిస్తుందోసారి  

తెల తెల్లవారున 

అల్లరి పరుగుల పసిడి లేడిలా

కనువిందు చేస్తుందోసారి 

ఆ నీలి కురులేమో

గాలి మాటుకు ఎగసిన ప్రతీసారి 

ఎన్ని కబుర్లు చెప్తాయో..!! తెలుసా ? 

కోపంలో ఎర్రబడిన ప్రభాత కిరణంలా 

సాత్వికంలో వెన్నెల మలయమారుతంలా 

వేకువన వికసించి ఎప్పటికీ వాడని 

కుసుమమై కనిపిస్తుంది 

ఏ విపంచీ పలికించలేని వేల భావాలను 

అలవోకగా, అత్యంత మధురంగా 

కళ్ళతోనే తాను పలికించగలదు

మది లోని ఆంతర్యాలను గప్చిప్గా  పరికించగలదు  

అందుకే తాను సత్య..!!

భూమ్యాకాశముల మధ్యన 

దిక్చక్రపుటంచులలో

పున్నమి, అమాసలను లెక్కించుచున్న 

కవి ఆర్ధభరిత అక్షరములలో ఇమిడి 

సౌష్టవ కీర్తి పతాకముపై లలితాంగిణిలా నవ్వుతూ 

నిల్చుంది అతగాడి  హృదయ వేదికపై..!!

Written by: Bobby Aniboyina

Mobile: 9032977985

Insta : https://www.instagram.com/aniboyinabobby?utm_source=qr

వసంత తరువు...

 

అగ్నిగాలులై వీచిన మహా గ్రీష్మాలనుంచి 

స్తన్యధారల్ని కురిపిస్తూ మేఘధేనువులు వచ్చాయి 

ఇన్నాళ్ళూ అరచేతిలో ముఖాన్ని దాచుకున్న వసంతం 

ఇప్పుడు తొలి ఆషాడ మేఘ సందర్శనం తో పురివిప్పుకుంది !!

 

అడవి చుట్టూ నెమళ్ళ పింఛాల వింజామరల సోయ"గా(నా)లు" 

నదులు, సెలయేళ్ళు పులకరిస్తూ సముద్రాలను పలకరిస్తున్నాయి

తోటల్లోని పువ్వులన్నీ పిల్లగాలులకు ఊగుతూ నవ్వుతున్నాయి 

ఆకాశమంతటా  చిక్కని మేఘాలు, 

పుడమంతటా కమ్మని సువాసనలు,

అందమైన సుదతి పాదాలపైని  మువ్వలల్లే 

ఆకుకింది వాన చినుకులు  తళుక్కున మెరిసాయి!!  

 

కానుగ చెట్ల గుబుర్లలో గుసగుసలాడుతున్న 

పాలపిట్టల చిలిపి రహస్యాలు

దట్టంగా అల్లుకున్న పూల పందిరి నీడలో 

కాలం తీరి ఒక్కొక్కటిగా నేల రాలుతున్న పువ్వారులు

ఆకుల జోల పాటల్లో కిలకిల్లాడుతున్న కొత్త చివుళ్ళు  

పత్రహరిత  ఛాయల్లో, కుసుమ కోమల పరిమళాల్లో 

ఏకాంతంగా మనోరథ వసంత శయ్యలో 

మైమరిచే క్షణాలను కలగంటూ పడుకున్నాను.. !!

 

Written by: Bobby Aniboyina

Mobile: 9032977985