ఓ కవీ ...

 ఓ కవీ

నీ సిరా చుక్కల్ని

ఈ సమాజం మీద చిందించకు

సహించని వాళ్ళు,

మాటల తూటాలు వదుల్తారు

మమ్మల్నే కెలుకుతావంటూ

కొత్త రంకులు నీ

కంటకడతారు..!!

అందుకని

శ్రీనాధునిలా

ఏ శృంగార కావ్యాన్నో,

కాళిదాసులా

ఏ మేఘసందేశాన్నో, వ్రాసుకో

బిరుదులిస్తారు,

బొమ్మలేస్తారు,

సంస్కరిస్తారు..సత్కరిస్తారు!!

నీ అంతరంగములో

వింత లోకాలను తీర్చి

తిక్క కుదిరేంత వరకూ

తైతక్కలాడుతూ రాయడం

ముందు మానేయ్..!

విభ్రమ నేత్రాలతో

చుట్టూ పరకాయించడం

మొదలు పెట్టు..

పట్టపగలు చుక్కలు పొడిచిన

మిట్ట మద్యాహ్నపు సొగసును

నీ రాతల్లో రాయాలనుకోకు

అర్హత, రాసేనీకు మాత్రమే వుంటే సరిపోదు

చదివి అర్ధం చేసుకునే వారికి కూడా వుండాలి

అయినా నా పిచ్చి కానీ

నీ మనసు వుంది చూసావు

ఉత్తి మొండి ఘటం

దాని తోవే దానిది

దాని రాత దానిదే కానీ

అఖిలేశ్వరుడు శాసించినా

రాయడం ఆపదుగా ..!

ఇదివరకు కవులు కూడా

ఇలా ఆలోచించి వుంటే

ఇప్పుడీ దేశం ఇట్లా ఉండేదా

జనం ఎంతో కసిగా తిట్టిన తిట్లన్నీ

వారు జీర్ణించుకుని

గప్చిప్గా వ్రాసుకుంటూ

ముందుకెళ్ళడమే కవంటే..!!

కవి దాహం అనంతసముద్రం

కవి కోరిక అనంతాకాశం

ఏడు వర్ణాలు త్రాగి

ఏక వర్ణం చిమ్ముతాడు

అతడే కవి..

అతడు మాత్రమే కవి..!!

Written by: Bobby Aniboyina

Mobile: 9032977985

మనసారా అభినందనలు ...

ప్రకృతి అంతా నాదే,

ప్రతీ భావానా నాదే

తొమ్మిది రసాలు నాలోనే వున్నాయి, వాటిని ఈ లోకానికే కొత్తగా చూపెడతానంటూ తన కుంచెతో రంగులద్దే వాగ్దేవి తను.

రెప్ప పాటంత జీవితకాలంలో దోసిళ్లతో దొరికినంత ఆనందం నింపుకొని సంబరపడాలనే పసి తత్వం తనది.

ఒక చిత్రానికి రూపం ఇవ్వడం అనేదానికన్నా ఆ చిత్రానికి ప్రాణం పోస్తున్నారు అంటేనే బాగుంటుందేమో. చిత్రం గీయడం అంటే బొమ్మల కొలువు కాదు. హృదయంలో పల్లవించి, రంగులలో పరిమళించి, కుంచెతో భావ స్పందనకు ప్రాణం పోయడం. అలా ప్రతీ చిత్రానికి ప్రాణాన్ని పంచేవారే కె. ప్రసన్న జ్యోతి గారు.

జీవితాన్ని చూడటం స్పృహ,

సమాజాన్ని చూడటం చైతన్యం,

రెంటినీ సమన్వయపరిచేలా ప్రవర్తించడమే నిబద్దత. అలాంటి గొప్ప మనస్కురాలు తను.

కన్నీటిని సానబెట్టి రసరమ్య చిత్రాలను అవలీలగా గీయగల ఆలేఖిత తను

సుఖానుభూతి కోసం కాక, మానవ కల్యాణం కోసం గీచె వారు చాలా అరుదు...!! అందుకే తను అంటే నాకు చాలా గౌరవం.

సహనానికి చెలికత్తెగా, దుఃఖమనే కలుపుమొక్కలను ఏరుతూ ఒంటరి పోరాటం చేస్తున్నారు.. పైకి పళ్ళికిలిస్తూ, పక్కనే రాసుకు పూసుకు తిరిగే గుంటనక్కలను సైతం చిరునవ్వుతో ఎదుర్కుంటూ, వారినుంచి మీకంటూ ఓ ప్రత్యేక గుర్తింపు తెచ్చుకున్నారు.. అన్నీ తెలిసిన అయినవారే ఎద్దు పుండు కాకికి రుచిలా మారితే పంటి బిగువున బాధను అణిచి నిశ్శబ్దమనే ఆయుధంతో, చెరగని చిరునవ్వుతో ముందుకు పయనించే మీ శక్తీ సామర్ధ్యాలను దూరంనుంచే గప్చిప్గా చూస్తున్నాను. పైకి ఒకలా, లోన మరోటి పెట్టుకొని తోకాడించే వరాహ సౌందర్యుల ఓదార్పు యాత్రలకు కుండ బద్దలు కొట్టే మీ పదునైన మాటలను నేను చూస్తున్నాను.. ఈ లోకానికి వచ్చి మీరు ఏరుకుంటున్నది పారేసుకున్న ధాన్యం కాదు. మీ చే జారిన జ్ఞాపకాలను. మీరెక్కే ఒక్కో మెట్టు ఒక్కో పురినొప్పులకు రూపం.

ఒక్కటి మాత్రం నిజం.

మీరు నిర్మించుకున్న ఈ ఆశావరూథములో...

ధైర్యమే ఒక కవచంగా సాగుతున్నమీకు...

అర్పిస్తున్నాను... ఈ అభిమాన నీరాజనం !

సమర్పిస్తున్నాను... మమకార సిరుల స్వర్ణ చందనం... !!

మనసారా అభినందనలు మీకు..

పత్రికల్లోనే కాదు మరింత అత్యున్నత శిఖరాలను మీరు అధిరోహించాలని మనస్పూర్తిగా కోరుకుంటున్నాను..

Written by: Bobby Aniboyina

Mobile: 9032977985

“లోగిలి” అంతర్జాల మాసపత్రిక

 “లోగిలి” అంతర్జాల మాసపత్రిక తమ సాధనసంపత్తులతో కృషీభూతులై తమ విశిష్ట కృషి ద్వారా ఉత్తమశ్రేణి సాహిత్య అభిలాషకులుగా వ్యవహరిస్తున్నటువంటి గౌరవ సంపాదకులు – శ్రీ నారాయణస్వామి చిన్న దాసరి గారు, గౌరవ సలహాదారులు – శ్రీ గౌరిశంకర్ భమిడిపాటి గారు, సంపాదకులు – “విశిష్ట సేవారత్న” “కవి మిత్ర” మహారధి ఫణీంద్ర గారు, సహా సంపాదకులు – శ్రీ అగ్ని శిఖ షణ్ముఖ గారు, కోశాధికారి & డిజైనర్ – శ్రీ అనిల్ కుమార్ గారు, ప్రధాన సలహాదారులు – శ్రీ సాంబమూర్తి లండ గారు, క్రియాశీలక కార్యదర్శి – శ్రీ రజితేంద్ర రెడ్డి గారు, సలహాదారులు – శ్రీ హేమంత్ కొరటమద్ది గారు.

సాహిత్యపరమైన వీరి వ్యాసాలు “లోగిలి” అంతర్జాల మాసపత్రిక ద్వారా అందరికీ సుపరిచితమే అయినప్పటికీ సాహిత్యసేవలో తమవంతు బాధ్యతను నిర్వహించుచూ ముందుకు సాగుతున్న సహృదయుల చేయూతను సర్వదా ఆశిస్తూ వారి గురించి ఓ నాలుగు మాటలు చెప్పాలనిపించింది.

బంగారం విలువ దాని వన్నెను బట్టి మాత్రమే కాని దాని రూప వైఖరులను బట్టి కాదు. అలానే ఒక పుస్తకం లేదా పత్రిక విలువ దాని విశ్వజనీనతను బట్టి తప్ప కేవల తత్కాలస్థితాలైన సాహిత్య ప్రమాణాలను బట్టి మాత్రం నిర్ణయించబడదు. ఇది నేను బలంగా నమ్ముతాను..అలాంటి పరిమితులతోనే రూపం దాల్చిన పత్రిక “లోగిలి” అంతర్జాల మాసపత్రిక.

పది విభాగాలుగా ఈ పత్రికలో పొందుపరిచారు. కవులు, రచయితలు, చిత్రకారులు, దర్శకులు, విమర్శకులు ఇలా ఎందరో కొలువుతీరిన ఓ మహాసమూహార గ్రంధం ఈ పత్రిక. కొత్తవాళ్ళకు అవకాశాలను కల్పిస్తూ, వారి గురించి నలుదిశలా చాటి చెప్పే ఓ గొప్ప ప్రయత్నమే ఈ పత్రిక ముఖ్య ఉద్దేశం.. అంతే కాదు ఎందరికో ఆదర్శప్రాయంగాను, మరెందరికో ఓ వేధికగాను అస్తమించని రవికిరణము వలె, విశ్రమించని కడలి కెరటము వలె వీరి ప్రస్తానం ముందుకు సాగడం నభూతో న భవిష్యతి.

ఒకసారి చాగంటిగారు అన్నారు .. బీజాక్షరము కలిగిన గ్రంధములను చదివితే మనలోకి అపారమైన శక్తి ప్రవహిస్తుందని.. కాని ఈ పత్రికలో ఎక్కడా బీజాక్షరాలు లేవు. అయిననూ అలాంటి అనుభూతికే లోనౌతాము అని నిస్సందేహంగా చెప్పగలను.. పుస్తక పఠనం చాలా గొప్పది.. అక్షర రసాన్ని అమృత రసంగా మనకు అందించేది అదిమాత్రమే.

పుస్తకాలను, పత్రికలను ఆదరించండి. ఎందుకంటె అవే మన భూత, భవిష్య, వర్తమానాలు. అవే కనుక లేకుంటే ఇంత జ్ఞానమూ, విజ్ఞానమూ రెండూ లేవు.

“లోగిలి” అంతర్జాల మాసపత్రిక వారు ఇంకా మరింత ముందుకు వెళ్ళాలని, ప్రతీ గుండెకు చేరువ కావాలని, ఎందరికో గొప్ప వేదిక కావాలని మనస్పూర్తిగా అభిలాషిస్తున్నాను..

లోగిలి పత్రిక సహా సంపాదకులు – శ్రీ అగ్ని శిఖ షణ్ముఖ తమ్మునికి నా ప్రత్యేక అభినందనలు

స్వస్తి.. __/\__

Written by: Bobby Aniboyina

Mobile : 9032977985