Saturday, September 10, 2022

సజీవ సాక్ష్యాలు..



కరువు సీమల
దప్పిక తీర్చేందుకై వచ్చిన వెలిమబ్బును
పొడితెమ్మెర మోహించింది
రెండూ చెట్టాపట్టాలేసుకొని
రేయంతా నడి సంద్రం మీద
వర్షాన్ని స్ఖలించాయి..!!

పచ్చని వర్ణాన్ని రాల్చుకొని
నగ్నంగా నిల్చున్న దశాబ్ధాల మహా వృక్షం
మోడుబారి మరణ వసంతానికై
వేర్లుచాపి నేలకొరిగేందుకు వేచి వున్నది..!!

బీటలువారిన మొండి నేల
పిడచకట్టిన నాలుక వేళ్ళాడేసుకొని
ఒక చుక్క నీటికోసం
తన ఆఖరి శ్వాస తీస్తోంది..!!

వెదురు తడికల ఇంటి వసారాలో
బెదురు మూల్గుల రైతు కంట తడి
గుక్క తీసే బిడ్డల ఏడ్పులలో
ఒక్క గింజైనా దొరకని వైనం..!
గంజినీళ్ళ ఎండు డొక్కలతో
ఎముకుల బొంత కప్పుకున్న
దేహాలకు సజీవ సాక్ష్యాలీ రైతు బ్రతుకులు..!!

Written by: Bobby Aniboyina
Mobile : 9032977985

Saturday, September 3, 2022

మన్మధుని నాళీకము...



తన కోసం
గతించిన కాలాన్ని
భావాల త్రాడుతో కట్టి
వెనక్కి లాక్కురావాలని వుంటుంది
భూత, భవిష్య, వర్తమానాలపై
తనకోసం యుద్ధం చెయ్యాలని వుంటుంది..!!

కలతల మానసపు మహా సముద్రంలో మున్కలేస్తూ
సమ సమాజం వెదజల్లే వెన్నెల వెలుగుల్లో
ఊపిరి పీల్చుకుంటూ
నిరాశా నిస్పృహల చీకట్ల హృద్గగనంలో
కన్నీటి తరంగాలు తన నుంచి
ఎగసెగసి పడుతున్న ప్రతీ సారి
నాలో ఓ నిర్లిప్తత..!!

కానీ
పిడికెడంత మనసు
ఆకాశమంత అల్లరి తనది..!
మనసు నెమ్మది లేనప్పుడు
గాలికి కొట్టుకొచ్చిన వేద మంత్రం
చెవిలో పడినంత హాయిగా
స్పృశిస్తుందామె గాత్ర మాధుర్యం..!

సిలువలోని స్వచ్ఛతను
నమాజ్ లోని సత్యమును
ఓంకారపు పవిత్రతను
కన్నార్పకుండా తనలో తానె
దర్శించగలిగే తాత్వికత తనది..!!

తనని హత్తుకున్న పిల్లగాలి సైతం
పరువపు గాలై గుబాళిస్తుంది
తనని చూసిన చెట్ల కొమ్మలు
ఊయలలూపే పువ్వారులై వర్షిస్తుంటాయి
తనని తాకిన వర్షపు జల్లు
తమకమపు తన్మయత్వమును పొందుతుంటాయి
ఆకాశపు నీలి మేఘాలు
చూపుల్ని పారేసుకుని ఓరకంటితో తననే చూస్తుంటాయి
పుడమి తన పాద స్పర్శకు
అమ్మతనపు అనురాగభావమై మురిసిపోతుంటుంది..!!

తనని చూస్తుంటే ఊపిరి కూడా భారమైపోతుంది
తను దగ్గరకు వస్తే గుండె కూడా వేగం పుంజుకుంటుంది
నిజంగానే తానో మంత్రించి విడిచిన మహా సుగంధము
కవ్వించి సమ్మోహపరిచే మన్మధుని నాళీకము..!!
తానో అద్బుతం అంతే ..!!

Writtn by: Bobby Aniboyina
Mobile : 9032977985