Saturday, December 16, 2017

స్వప్న పరిష్వంగము...


తీర్చిదిద్దిన ఆమె కాటుక కళ్ళని 
ఊహించుకుంటూ మురిసిపోతానే కానీ,
తన కళ్ళనెప్పుడూ సూటిగా చూడలేదు..!!

రుచి పుట్టించే పెదాలకోసం నిరీక్షిస్తూంటానే కానీ, 
ఒక్కసారి కూడా సంతృప్తిగా ముద్దిచ్చి ఎరుగను..!!

చుక్కల మధ్య నుంచి 
తెల్ల హంసల తెలిమబ్బుల మధ్యనీంచి 
క్రీగంట చూపులతో ఆహ్వానాలు గుమ్మరిస్తూ ఉంటుంది..
అకస్మాత్తుగా నా చెవుల్లో నాల్గు వాక్యాలు 
ముద్దు ముద్దుగా ఊది చకోరిలా ఎగిరిపోతుంటుంది.. 
ఏ అందియల చప్పుడు విన్నా నువ్వేనేమోనని 
చెవులు రిక్కించడం నాకు మామూలైపోయింది..!!

నీ భావాలనలా అల్లుకుంటూ, గిల్లుకుంటూ 
నిద్రలో పడుతూ లేస్తూ, 
ఆకాశాన్ని, అల్లిబిల్లి ఊహల్నీ ఆహ్వానిస్తూ, 
స్వప్నిస్తూ, చెవులు చీరుకుంటూ 
నాలో నేనే ఏదో గొణుక్కుంటూ వుండిపోతుంటాను ..!!

అందమైన పక్షిలా మారి అలా హఠాత్తుగా 
నా బాహువులపై వాలి క్షణాల్లో నవ్వుతూ 
వెళ్ళిపోవడం తనకలవాటే కావచ్చు 
స్వప్న పరిష్వంగముల కోసం నిరీక్షిస్తూ, 
ఎడారి బండరాళ్ళ మధ్య ఇరుక్కుపోయి 
గిలగిల్లాడ్డం నా కొక్కడికే తెలిసిన యదార్ధసత్యం..!!

నువ్వే నన్ను వెలివేసావో..
నీ భావాలే నన్ను వెలివేసాయో నాకైతే తెలియదు.. 
ఏకాంత నిశ్శబ్దమే నా అంతఃపురమైంది.. 
నీ దేహ సౌందర్య దృశ్యమే నా జీవితాదర్పణమైంది.. 
నీ చిరునవ్వే తాంబూల చర్వణమైంది.. 
నా భావాలతో పొదిగిన నీ దేహం 
స్పర్శా వ్యామోహం లేని శిలలానే మిగిలిపోయింది..!!

నీ నుంచి రాలే రెండే రెండు 
ప్రేమ శకలాల కోసం 
ఆకాశం మీది చుక్కల్ని మొత్తం చీకట్లో వడబోస్తూ 
లెక్కెడుతున్నాను .. !!

Written by : Bobby Nani

No comments:

Post a Comment