SOCOTRA (The Mysterious Island) from Bobby... 34th Part

SOCOTRA

                                      -The Mysterious Island-

మునుపటి భాగాన్ని మనం ఒక్కసారి మననం చేసుకుందాం ... 

తనని గట్టిగా హత్తుకొని మళ్ళి నేను తిరిగి వస్తాను అని చెప్పి మెరుపువేగంతో అక్కడనుంచి చంద్రిక కొలనులోకి వెళ్తుంది మీననేత్రి.. అప్పటికే ఆ కన్నీరు కొలను మొత్తం విస్తరించి ఆ రెండు మీనాలు కూడా స్పృహ కోల్పోయి పడివున్నాయి.. ఇప్పటికే చాలా ఆలస్యం అయింది అనుకొని ఆ చంద్రిక కొలను అడుగుభాగానా చాలా వేగంగా వృత్తాకారంలో తిరుగుతుంది మీననేత్రి.. 

ఆ వేగానికి చంద్రిక కొలనులో భయంకరమైన సుడిగుండం ఒకటి ఏర్పడుతుంది..

తరువాత ఏంటో చూద్దాం పదండి..

34th Part

కన్నీళ్ళు పంపే యంత్రపు గొలుసు తెగిపోయి తునాతునకలు అయిపోయింది.. ముందుగానే పసిగట్టిన ఆ ఇద్దరు వ్యక్తులు కొన్ని క్షణాలముందే కొలను నుంచి బయటకు వెళ్ళిపోయారు.. స్వేతవర్ణపు రెండు మీనాలు స్పృహ కోల్పోయి చంద్రిక కొలను చుట్టూ వేగంగా తిరుగుతున్నాయి.. బయట వున్న అందరూ భయపడిపోతూ ఏమిటి ఇదంతా అని ఎవరికివారు ఏదేదో ఊహించుకుంటూ మాట్లాడుకుంటున్నారు..

అంతలో కొలను చుట్టూ ఆ సుడిగుండం అంతకు అంత మరింత పెరిగిపోయి చాలా లోతు వరకు సుడి ప్రస్పుటంగా కనిపిస్తుంది.. అలా కనిపించడం వల్ల .. ఆ కనిపించేంత వరకు చంద్రిక కొలను లోతు ఎంత వుందో ఒక అవగాహన వస్తుంది.. దాదాపుగా పొడవైన ముప్పై తాటి చెట్లు లోతు ప్రస్తుతానికి వున్నట్లు కనిపిస్తుంది.. దానికి కింద ఇంకెంత లోతు ఉంటుందో అని అక్కడివారు అనుకుంటూనే కళ్ళు తిరిగినట్లు అనిపించి దూరంగా వచ్చేస్తారు.. 

ఇక్కడ పెను ప్రమాదమేదో జరగబోతున్నట్లు వుంది.. మనం ఇక్కడ వుండటం మంచిది కాదు అంటూ ఆ బృందంలోని ఒక వ్యక్తి బిగ్గరగా అరుస్తాడు.. అంతలో మరో వ్యక్తి మాట్లాడుతూ .. మరేం పర్వాలేదు.. అన్నిటికీ సిద్దపడే ఇక్కడకు వచ్చాముగా.. ఎన్నో ఏళ్ళ కల ఇది .. ఇప్పుడు చేజారితే ఇక మనకు ఎప్పటికీ సాధ్యం కాదు.. మీరెవ్వరూ భయపడొద్దు.. దీన్ని ఎలా ఆపాలో నాకు బాగా తెలుసు అంటూ.. ఆకాష్ ప్రేయసిని ఆ ప్రక్కన పడివున్న కొరడాతో కొట్టడం మొదలు పెట్టాడు.. 

ఎందుకు తనని బాధిస్తున్నారు.. తనేం చేసింది అని ఆకాష్ అడుగుతాడు.. 

తన మెడలో ఏదో తాబేలు హారం ఉందంట కదా.. దాన్ని తీసి మాకు ఇవ్వు లేకపోతే తనని ఇంకా బాధించాల్సి వుంటుంది.. 

నేను తీసి ఇస్తాను తనను బాధించకండి అంటూ వేడుకుంటాడు ఆకాష్.. 

మోకాళ్ళపై భారంగా నడవలేక నడుస్తూ ఆ అమ్మాయి దగ్గరకు వెళ్ళి .. నన్ను క్షమించు.. ఈ హారాన్ని వారికి ఇవ్వాల్సి వస్తోంది.. అంటూ తన మెడలోని హారాన్ని తీయగానే అప్పుడు తన చేతిలో తళుక్కున మెరుస్తుంది ఆ తాబేలు హారం అందరికీ కనిపిస్తూ… 

అది చూచిన వెంటనే ఆ కొరడాతో బాధించిన అతను.. దాన్ని అమాంతం లాక్కుంటాడు ఆకాష్ చేతుల్లోంచి.. ఆ హారాన్ని చంద్రిక కొలనులో విసురుతాడు.. 

ఆ హారాన్ని చూసిన మీననేత్రి భీకర సుడిగుండాన్ని ఆపేస్తుంది.. చేతిలోకి ఆ హారాన్ని తీసుకొని బాధగా అలా ఉండిపోయింది..

త్వరగా.. వెళ్ళండి.. సుడిగుండం ఆగిపోయింది.. వెళ్ళి ఆ స్పృహ కోల్పోయిన రెండు శ్వేత మీనాలను తీసుకురండి.. అంటూ గదమాయిస్తాడు కొరడా చేతబూనిన వ్యక్తి.. 

ఈ మాటలన్నీ వింటున్న మీననేత్రి ఒక్కసారిగా నీళ్ళలోంచి మెరుపువేగంతో పైకి దూసుకొచ్చి పది అడుగుల ఎత్తులో నిల్చుంటుంది.. 

నడుమునుంచి తోక భాగం వరకు శ్వేత వర్ణంతో ధగధగ మెరిసిపోతూ ఎంతో కాంతివంతముగా వుంది.. నడుము పైభాగం నుంచి బంగారు వర్ణంతో స్వర్ణశోభాయమానంగా చాలా అందంగా వుంది.. అందరూ ఆశ్చర్యంతో తనను అలానే చూస్తూ వున్నారు.. తన చేతిలో ఆ రెండు శ్వేత మీనాలు కూడా వున్నాయి.. కోపంతో తన రెండు నేత్రాలు చిక్కటి నీలంరంగులో మెరిసిపోతున్నాయి.. 

అదృష్టం అంటే మనదే.. ఒకదానికోసం వస్తే మరొకరి తారసపడింది.. ఈ మత్స్యక మామూలు మత్స్యక కాదు.. ముందు దాన్ని బంధించండి.. అంటూ అరుస్తాడు కొరడా పట్టుకున్న వ్యక్తి.. 

ఆ మాటలకు మరింత కోపం పెరిగిపోతుంది మీననేత్రి కి.. 

తన నోటితో వృత్తం వంటి వలయాన్ని నీటితో ఏర్పరిచి ఆ కొరడా పట్టుకున్న అతనిపై వేగంగా వదిలింది.. తను ఆ నీటి వృత్తంలో చిక్కుకొని క్షణాల వ్యవధిలోనే వికృత ఆకారానికి మారి ఇదివరకు స్త్రీ లు చనిపోయిన విధంగా తను చనిపోయాడు.. 

మీననేత్రి చేసిన ఆ చర్యను చూసి భయంతో అందరూ తలోదిక్కుకు పరిగెడతారు.. 

అప్పుడే యక్షామీల సమూహం అక్కడకు చేరుకోని పారిపోతున్న అందరినీ చిత్రవధ చేసి బంధించారు.. అఘోరా, యక్షామీ (ఉవిధ) వారందరినీ ఆ నౌకలోనికి ఎక్కించమని యక్షామీలను ఆదేశించారు..!!

అఘోరా ఇద్దరి యక్షామీలకు సైగ చేస్తాడు.. వారు వెళ్ళి లోకేష్ ని జాగ్రత్తగా మోసుకొచ్చి చంద్రిక కొలను దగ్గర పడుకోబెడతారు.. ఇతని మరణం అసందర్భసంభవము.. ఇతనికి ఇంకా ఆయుష్షు వుంది.. నీలో వున్న సప్తధాతువులను ఇతనిలోకి ప్రవేశపెట్టు.. జీవాన్ని ఇతనికి పుణికరించు.. ఇది ధర్మమే.. అనాలోచితముకాదు అని అంటాడు ఆ అఘోరా.. 

మీననేత్రి కాసేపు ఆలోచించి.. ఆకాష్ ప్రేయసి వైపు చూసి తల సరే అన్నట్లుగా ఊపుతుంది..

సప్తధాతువులను తన శక్తిచే చేతుల్లోకి తీసుకొని లోకేష్ నుదిటిపై చేతులను ఉంచుతుంది.. 

తనలో ఎలాంటి కదలిక లేదు.. 

మరోసారి ప్రయత్నించు అంటాడు అఘోరా.. 

అక్కడ వున్న అందరిలో ఒత్తిడి తారాస్థాయికి చేరుకుంది.. ప్రసన్నకుమార్ భాటియా ముఖముపై స్వేద జలము జారుతూ గవుదము దగ్గరకొచ్చి ఒక్కొక్కటిగా నేల రాలుతూ వుంది.. 

మీననేత్రి మరోసారి ప్రయత్నించింది.. మళ్ళి అదే వైఫల్యం ఎదురైంది.. 

అలా మళ్ళి మళ్ళి ప్రయత్నిస్తూనే వుంది.. కానీ లోకేష్ ఎంతకీ కళ్ళు తెరవట్లేదు.. తనలో జీవం ఊపిరి పోసుకోవట్లేదు.. 

ఇక నావల్ల కాదు..

తనలోని జీవ ధాతువులను మేల్కొలిపేందుకు ఆలస్యం అయిందేమో అంటుంది బాధగా మీననేత్రి..

అఘోరాకి కూడా అంతుపట్టక ఆలోచిస్తూ మౌనంగా ఉండిపోయాడు.. 

కాసేపు ఆ ప్రాంతం అంతా నిశబ్దంతో భారంగా మారిపోయింది.. 

To be continued …

Written by : BOBBY