“తామరనేత్రిని” ...

అదేంటో నే

నీ రూపాన్ని చూడగానే నా కనుపాపలో

కోటి కుసుమాలు ఒక్కసారిగా వికసించాయి...!!

అనేక తారలు తళుక్కుమని మెరిసాయి.. !

ముదురు నీలిరంగు చీరలో,

నువు అలా నడుస్తుంటే..

అరణ్యపు మయూరము నా ముంగిట నర్తిస్తున్నట్లు అనిపించింది.. !!

వెన్నెల ఎంతో అందంగా ఉంటుంది..

కాని, నిన్ను చూసాక నా కళ్ళకు ఆ వెన్నెల కూడా వెలవెలబోయింది.. !!

కనురెప్ప వేసే క్షణంలో కూడా నిన్నే,

చూడాలని పరితపిస్తున్నాయి నా నేత్రములు.. !!

శంఖం ఆకృతిలా వున్న నీ కోమలత్వాన్ని చూచుటకు

వెయ్యి నేత్రములైనా సరిపోవే ..!!

ఛందస్సు వదలని సంప్రదాయ పద్యం లా..

సంగీతం లేక కదలని శాస్త్రీయ గేయం లా .. వున్న నన్ను..

వచనా కవిత్వం లా వచ్చి తాకావు..

పల్లవిలేని నీ వలపు పాటలు ..

నియమం లేని నీ పద్య పాదాలు..

అలంకారాలు లేని నీ అమాయక హావా భావాలు..

నన్ను ఊపిరాడక ఉక్కిరిబిక్కిరి చేస్తున్నాయి.. !!

తెల తెల్లవారున పారిజాతపు కుసుమాలు రాలినంత

సుతిమెత్తగా నీ పాదాలు ఆ ధరణినిని ముద్దాడుతుంటే..

నీ దేహం నుంచి గంధపు పరిమళాలు వెదజల్లుతుంటే ..

పిల్లగాలికి నీ కేశములు వెన్నెల వంటి ఆ నడుమును

తాకుతూ గిలిగింతలు పెడుతుంటే...

ఘడియ ఘడియకో మధుర చుంబన “లా”

నా అణువణువునూ స్పృశిస్తున్నాయి...!!

ఒక్కసారి నిను కనులారా చూస్తే చాలే

క్షణాలు కాదు..

యుగాలను సైతం గప్చిప్గా దాటేస్తా .. !!!

Written by : Bobby Aniboyina

Mobile: 9032977985

18.01.2017