నీ
నుంచి రాలిన
మహాసుగంధం కోసం
ప్రాచీన పర్వతాలన్నీ వెతికాను..!
పక్కన
నువ్వు వున్నప్పుడు
నా గుండెకు
నీ గుండె చప్పుడు
తాకుతున్నా తెలియరాలేదు..!
ఊపిరి మల్లెల సుగంధమై
నను అల్లుకున్నా తెలియరాలేదు..!
మెత్తని నీ శృంగార స్పర్శ
సమ్మోహన పరుస్తున్నా నాకు తెలియరాలేదు..!
వంటరిగా నా చెయ్యిని
నువ్వు వదిలేసినప్పుడు
చీకటి నన్ను అలుముకుంది..!
గది మూలన బూజు
వేళ్ళాడుతూ వెటకరించింది..!
నా మది నిండా కమ్ముకున్న
ప్రచండ తుఫాను
తీరం దాటే దేనాటికో..!!
నా
ఇంద్రియాల్ని
అదృశ్య సంకెళ్ళతో బంధించుకున్నాను
ఒంటరిగా తచ్చాడుతూ,
దేవదారు తరు పంక్తుల మధ్య
ఓ సాయం సంధ్యా వేళలో
కొద్ది కొద్దిగా హిరణ్యరశ్మిని
ఏరుకుంటూ అనుభవాల్ని
తవ్వుకున్నాను..!!
నా
మది పుస్తకంలో
నే అపురూపంగా
దాచుకున్న నెమలీకవి నీవు..!
గాలి కెగురుతున్న నీ
నీలి రంగుల శిరోజాలు
నా రెండు కళ్ళ మధ్యన
ఇంకా ప్రకంపిస్తూనే వున్నాయి ..!
ఆ రోజులన్నీ మన మధ్య ఇక వెళ్ళినట్లే నేమో
కాలానికి అటువైపున నీవు
ఇటువైపున నేను..!!
మహావలయ మాయా కల్పిత నా
జీవిత జగన్నాటకంలో
అనుకోని అతిథిగా నీవొచ్చి నిల్చున్నావు
చీకటి మొగ్గ వెలుగు రెక్కలు విప్పుకున్నట్లు
నా జీవితం ఒక్కసారిగా ప్రకాశవంతమైంది
సైకిల్ పై ఇంటికి చేరే ప్రేమ లేఖలా
తోటలోంచి ఎగిరొచ్చే బొండు మల్లె సువాసనలా
మురిపించావ్, మైమరిపించావ్..!
ఆ సుగంధమే కరువైందీనాడు..!!
ఎక్కడని వెతకను ?
ఎంత దూరమని తిరగను ?
ఇన్నేళ్ళ మన ప్రయాణంలో
మార్పేదైనా ఉందా అని చూసా
ఆలోచనల్లో లేదుకానీ
సమయాన్ని కేటాయించడంలోనే వచ్చింది చిక్కంతా..!
రాకేం చేస్తుంది లే..
ఎదురుగానే వున్నా
సంద్రానికి అటువైపున నీవు,
ఇటువైపున నేను..!!
నిశితంగా చూడు
వెచ్చని వెలుతురును
చిక్కని చీకటి కప్పుతూ వస్తుంది
నువ్వు కూడా బంధమనే మలుపు దగ్గర
బాధ్యతనే రేపటికోసం వెళ్ళిపోయావ్ కదా..!!
విభ్రమ నేత్రాలతో చేజారిన
సుగంధాన్ని ఇక వెతకడం మాని
గడిచిన నీ మధుర జ్ఞాపకాలతోనే
ఇకపై నా ప్రస్థానం ముగుస్తుంది..!!
Written by: BOBBY Aniboyina
No comments:
Post a Comment