నాలో నేనే.. నాతో నేనే..

నాలో నేనే.. నాతో నేనే.. 

***************** 

ఎక్కడా పరచని ఊహలను 

లెక్కలేనన్ని అనుభూతులను 

ఏరుకొచ్చి 

జీవనిర్భర భావ చిత్రాలలో 

కలిపి, నిలిపే నా కలం 

నీ అపురూప కళా సౌందర్యాన్ని చూచి 

తన గొంతును కదుపలేక.. కంపిస్తుంది..!! 

కోమలీ..! 

నిను ఆహ్వానించేదెలా 

నా గుండె బరువు తీరేదెలా..!! 

మిన్నేరు నీ కాళ్ళ మీదే ప్రవహిస్తుందా ? 

మెరుపు కన్నెలు నిన్నే స్పృశించి నర్తిస్తున్నాయా ? 

నీ అంగాంగంలో 

సుధా స్రవంతులు పొంగి పారుతుంటే 

నీ అధరపుష్పంలో సంధ్యారుణిమ 

మధుర గీతాలు పాడుతుంటే 

నా చాకితాంతరంగంలో 

నవభావనలేవో వికసిస్తూ, 

ఈ సృష్టికి అర్ధ పరమార్ధాలు 

నాకీ నాటికి బోధపడుతున్నాయి..!! 

వాక్కులకూ ఊహలకు చిక్కవని 

విధిలేక ఒప్పుకుంటాయి 

విశ్వసాహిత్యాలు..!! 

రంగులకూ, రాగాలకూ అందవని 

లోకంలోని కళలన్నీ పూ దండలై 

నీ కంఠమును అలంకరిస్తాయి..!! 

శస్త్రాలు, సకల అణ్వస్త్రాలూ 

నీ చూపు చలువలో 

మంచు గడ్డలుగా నిలిచి పోవా..! 

పాపాలూ, పంకిలాలూ 

నీ కంటి దీపాల వెలుతురులో 

తానమాడితే పుణ్య తీర్థాలైపోవా..! 

నీ మదిలోని భావ పుష్పాలనుంచి 

ఒలికిపడే ఉచ్చ్వాస సౌరభాలను 

మోసుకుపోయే పిల్లగాడుపులకంటే 

ధన్యాత్ములెవరే ? 

ఎన్నాళ్ళు, 

ఎన్నేళ్ళు నిరీక్షణతో 

తపస్సు చేసిందో ఈ మట్టి గోళం 

ఈ నాటికి తన కోర్కె ఫలించింది.. 

నీ మందస్మిత కాంతి భూషలు ధరించేందుకు..!! 

ఓ 

నవ యౌవన మోహినీ 

కనిపిస్తూ వుంది 

సర్వశాస్త్రార్ద సారం నీ 

దరహాస మకరంద ధారలో 

శబ్దాలు, అలంకార శాస్త్రాలు 

నీలో చూచుకొని తమను తాము సరిచూచుకొని 

శోభిస్తున్నాయి..!! 

రమణీ ..!! 

ఎంత రమణీయము 

నీ ఈ జీవితోత్సవము 

కళలన్నీ రంగురంగుల బావుటాలై 

సాహిత్యాలన్నీ సరస కావ్య సౌరభాలై 

సౌందర్యాలన్నీ మహోజ్జ్వల దీప మాలికలై 

ఆనందాలు స్వాగత తోరణాలై 

జరుపుచున్న ఈ మహోత్సవాన్ని మైమరిచి 

నాలోని కన్నులు తెరిచి దర్శిస్తున్నాను. 

హర్షం వర్షిస్తున్నాను.. 

నాలో నేనే.. నాతో నేనే..!!

Written by : Bobby Nani