అభినవ సత్యభామ...

కొందరిని చూస్తే మాట్లాడాలనిపిస్తుంది, మరికొందరిని చూస్తే ప్రేమించాలనిపిస్తుంది ఇంకొందరిని చూస్తే ఇష్టపడాలనిపిస్తుంది.. ఆమె నా ఈ అభినవ సత్యభామ ..

అభినవ సత్యభామ

**************

ఆమెను చూడాలంటే కళ్ళతో కాదు... 

హృదయంతో చూడాల్సిందే.. 

అబ్బ ఏమి అందమో, 

యెంత లావణ్యమో,

నిజం చెప్తే నమ్మరు కాని ..

పుడమి హర్షిస్తుంది

తన పాదపద్మములు తగిలి.. 

మేఘాలు వర్షిస్తాయి 

తన సుగంధాల శ్వాస తాకి.. 

మయూరము పురివిప్పియాడును 

తన దేహ సౌందర్య కాంతులకు..

తుమ్మెదలు పరితపించును 

తన పెదవుల తియ్యదనానికి.. 

కొందరిని చూస్తే, అలా చూస్తూ ఉండాలనిపిస్తుంది ..

ఇంకొందరిని చూస్తే, ఆరాధించాలనిపిస్తుంది ..

ఆమెను చూస్తే మాత్రం ఏంటో నా భావాల్ని చూస్తున్నట్లు వుంది.. 

తన నేత్రాలకు అంటిన ఆ కాటుక ఘాడంగా ఆమెను కౌగిలించుకొని చెరగనంటోంది..

తన మోముకు అంటిన పున్నమి వెన్నెల ఆమెను వదలనంటోంది.. 

తన అధరములనంటిన గులాబి వర్ణం ఆమెను చూసి సిగ్గులొలుకుతోంది..

పారిజాతపు కుసుమం వంటి ఆమె దేహ పరిమళములు 

మదనుడిని మత్తెక్కించి ఆహ్వానము పలుకుతున్నాయి.. 

ఆమె చూసే క్రీగంట చూపులు సమ్మోహితుడను చేస్తున్నాయి.. 

మొదట ఆమెను నా నేత్రాలతో చూశాను .. 

ఎలాంటి సౌందర్యం కనిపించలేదు..

ఆశ్చర్యమేసింది.. 

హృదయపు తలుపులు తెరిచి మరలా తేరిపారా ఆమెను చూడసాగాను.. 

బోలెడన్ని సౌందర్య అందాలు ఆమె అణువణువునా అమరి వున్నాయి..

ఆమె నలుగుపిండితో అభ్యంగనస్నాన మాచరించి

లేలేత పసుపు తన వంటి మొత్తానికీ రాసుకొని.. 

ముదురు కుంకుమ వర్ణం గల రవిక, చీర కట్టుకొని, 

నుదిటిన పాపిడిబిళ్ళ పెట్టుకొని, 

నడుము కిందకు జాలువారే వయ్యారాల వాలుజడతో,

విరబూసిన పుష్పాల అలంకరణతో, 

చెక్కిలినంటిన సౌందర్య చుక్కతో, 

గంధపు లలాట తిలకముతో,

అరచెయ్యిని అంటిన యెర్రని గోరింటాకుతో,

పునుగు, జవ్వాది మొదలగు దేహ పరిమళములతో,

పారాణి కలిగిన పాద పద్మములతో,

ముద్దులొలికే ముక్కుపుడకతో,

కంఠమున ధరించిన ఎద సౌందర్యాభరణంతో,

చెవికి అలంకరించిన కర్ణికతో.. 

అరిటాకు వంటి శృంగార నడుముకు,

ముద్దుల వడ్డానంతో..

హంస నడకలు చిందుతూ.. నా 

హృదయ వేదిక మీద నవరస రూపిణియై,

నవజీవన నాయికవై 

అనంగ శరాలు వర్షించే ఆంగికాభినయంతో .. నర్తించు 

నా అభినవ సత్యభామలా... !!!

Bobby Nani