పశ్చిమం నుంచి వస్తున్నఓ పిల్లగాలి 

చెంపల పై చిరు ముద్దులతో సన్నగా స్పృశిస్తూ 

ఆత్మీయ భావాలను మోసుకొచ్చింది..!!

ఈ ప్రపంచానికి 

అటువైపున నీవు 

ఇటువైపున నేను 

దుర్భేధ్యమైన గాజు పలకల మధ్య నిలబడి 

మన రెండు హృదయాలు ఎంత దగ్గరగా మాట్లాడుకున్నా 

ఒకరి మౌనం మరొకరికి అర్ధం కాదు..!!

ఎన్నో యుగాల దూరం లో

మన రెండు ఒంటరి ప్రపంచాల్లో 

దోసిళ్ళ కొద్దీ మన గతాల్ని 

నెమరేసుకుంటూ ఎడతెగని 

అమాస, పున్నములలో 

దేవులాడుకున్నా ఒకరి చూపు ఒకరికి కనపడదు..!!

ఏక వాసరము జ్ఞాపికలో 

యుగాల ఎడబాటును ఆస్వాదిస్తున్నా..!

కాలమనే విత్తుకి 

కన్నీటి చుక్కలను రాలుస్తున్నా, 

కలయికలేని చిరు మొలకను 

కనికరం లేకుండా గాయపరుస్తున్నావ్..!!

ఉబికి వస్తున్న వెక్కిళ్ళనాపి 

ఎగసిపడే ఎర్రజీరల్ని 

కళ్ళలో నిలిపి 

సాయంత్రం మునిగిపోయే పగల్లా, 

ఉదయమై ఎగసిపోయే రాత్రి లా

ప్రేమను వర్షించే ఓ అఖండ వర్షధార కోసం 

దోసిలి చాచి చూస్తున్నాను..

వస్తావు కదూ..!!

Written by: Bobby Nani