ఆకు మీద ఆగిన మంచుబిందువులో
అనంతాకాశపు ప్రతిబింబం దాగి ఉంటే,
అణువణువులో పరమాత్మ లేడని
ఎవరు చెప్పగలరు?
పంచభూత పుటములపై పరబ్రహ్మ రాసిన
మౌన మంత్రాక్షరాల సమాహారమే ప్రకృతి!
దానిని కళ్లతో దర్శించువారికి సౌందర్యం మాత్రమే కనిపిస్తుంది!
హృదయంతో ఆలకించువారికి దైవత్వమే అనుభవమవుతుంది!
ఉదయించే సూర్యుడిలో అగ్ని కాదు ఆది జ్యోతి ఉంది.
పారే నదిలో నీరు కాదు నాదబ్రహ్మ ఉంది.
విరిసే పుష్పంలో వర్ణం కాదు దైవత్వం ఉంది.
గాలి తాకిడిలో చలనం కాదు కనిపించని కరుణ ఉంది.
భూమి గర్భమున జన్మించే ప్రతి విత్తులో
పునర్జన్మ రహస్యము నిద్రిస్తుంది.
శిలపై జారే ప్రతి జలరేఖలో
కాలం తన మౌనగాథను చెక్కుకుంటుంది.
పర్వత శిఖరాల నిశ్చలతలో
తపస్సులో మునిగిన యుగాల ధ్యానం మెరిసిపోతుంది.
సముద్ర తరంగాల ఉప్పెనలో
అంతరంగాన్నే ఆలపించే ఆది నాదం విరుస్తుంది.
మేఘగర్భంలో మెరిపించే మెరుపు
విశ్వచైతన్యము ఓ క్షణం తన నేత్రాలు విప్పిన దివ్యస్ఫురణ.
ఉరిమే గర్జన
మౌనంలో మునిగిన మనసులను మేల్కొలిపే
ప్రకృతి ఉచ్చరించిన ఆకాశ వేదమంత్రం.
వెన్నెలలో జారే ఆ శీతకాంతి
అలసిన లోకమంతా నెమ్మదిగా నిమురుతున్న
పరమకరుణామూర్తి హస్తస్పర్శ.
వానచినుకులో తడిసే నేల వాసన
సృష్టి తన మూలస్మృతిని తలచుకుని
పులకరించిన గర్భగానం.
అరణ్యపు నీడలోనూ
అగ్నిజ్వాల అంచునా
మంచుతునక నిశ్చలతలోనూ
విప్లవ వర్షధార దారుణతలోనూ ఆ పరమాత్మ ఉన్నాడు!
కానరాని దేవుడని వెదికే మనిషి
తాను నడుస్తున్న నేలని
ఒకసారి గమనించినా సరిపోతుంది కదా!
ప్రతి రేణువూ ఒక యుగసాక్షి,
ప్రతి శ్వాసా ఒక దివ్య అనుగ్రహం,
ప్రతి హృదయస్పందన ఒక అజరామర నాదం.
మనం దేవాలయ గర్భగుడిలో నిలబడి
ఘంటానాదం వినగానే భక్తితో తలవంచుతాము.
కానీ ఉదయాన్నే పక్షుల గానంలో
ఆ దేవనాదం నీకు వినిపించట్లేదా?
దీపారాధనలో మెరుస్తున్న జ్యోతి ముందు
నీ మనసు కరిగిపోతుంది కదా!
అదే జ్యోతి సూర్యకిరణమై
ప్రతి ఉదయం నీ గుమ్మం ముందుకే రావట్లేదా!
ప్రకృతిని ప్రేమించుట అంటే
పూలను, పర్వతాలను, వర్షాలను ఇష్టపడటమే కాదు
సృష్టిలో విస్తరించిన ఆ పరమ చైతన్యాన్ని అర్ధం చేసుకోవడం
ప్రకృతిని కాపాడుట అంటే చెట్లను మాత్రమే రక్షించుట కాదు
మన అస్తిత్వమునకు మూలమైన దైవశ్వాసను కాపాడటం
ప్రకృతిని ఆలకించుట అంటే శబ్దాలను వినడం కాదు
నిశ్శబ్దముగా పలికే పరమాత్మను గ్రహించడం
అణువులో అనంతం ఉంది,
చినుకులో సముద్రం దాగుంది,
పువ్వులో పరిమళముంది
మనసులో మహాశక్తి దాగుంది
దాన్ని తెలుసుకున్న క్షణం నుంచే
ఈ ప్రపంచం సాధారణ దృశ్యంలా కాదు
ప్రతి దిక్కూ ప్రత్యేకంగా కనిపిస్తుంది
ప్రతి క్షణమూ ఓ దివ్యానుభూతిగా మారుతుంది
ప్రతి శ్వాస ఓ ప్రార్థనగా మారుతుంది.
ప్రకృతి అనేది బయట కనిపించే సౌందర్యం కాదు
పరమాత్మ తనను తాను
పంచభూతాల రూపంలో
మనకందించిన
నిత్య నిశ్శబ్ద మహాకావ్యం!!
~~ త్రిశూల్ ~~
Written by: Bobby Aniboyina
Email: baburajendhra@gmail.com
Blog: http://bobbynani.blogspot.com/
Insta: https://www.instagram.com/aniboyinabobby?igsh=MzNlNGNkZWQ4Mg==
