చెయ్యని నేరానికి శిక్ష..

చెయ్యని నేరానికి శిక్ష.. 

****************

ప్రమాదాలు ... ప్రమాదాలు .. 

పేపర్ చూస్తే ప్రమాదాల వార్తలు.. టి.వి. చూసినా అవే వార్తలు, బయటకు వెళ్ళినా అవే వార్తలు .. ఏరోజూ ఈ వార్త లేని పేపర్ గాని, టీవీ న్యూస్ గాని లేదు.. ఈ వార్తలు మన భారతదేశంలో ఎక్కువ సంఖ్యలో విలయతాండవం చేస్తున్నాయి.. ప్రపంచ వ్యాప్తంగా విస్త్రుతరూపం దాల్చిన ఈ మృత్యురాక్షసిని నియంత్రించేదెవరు ?? 

చెయ్యని నేరానికి శిక్ష ఉంటుందా ?? 

అంటే తప్పనిసరిగా ఉంటుంది.. అవే ఈ రోడ్డు ప్రమాదాలు.. 

దీనిద్వారా ఎంతమంది చెయ్యని నేరానికి శిక్ష అనుభవిస్తున్నారో.. !! 

ఎన్ని కుటుంబాలు శోకసముద్రంలో మునిగిపోతున్నాయో లెక్కే లేదు.. 

సహజ మరణాలు తగ్గిపోతున్నాయి.. ప్రమాద మరణాలు పెరిగిపోతున్నాయి.. ముసలీ ముతకా మాత్రమే సహజ మరణం పొందుతున్నారు.. యువశక్తి చాలా వరకు అర్ధాంతరంగా నశించిపోతోంది.. 

ప్రభుత్వం జనాభా పెరిగిపోతోందని గగ్గోలు పెడుతుంటే బిడ్డలను పోగొట్టుకున్న తల్లులు, భర్తలను పోగొట్టుకున్న భార్యలు, తల్లితండ్రులను పోగొట్టుకున్న బిడ్డలు, భార్యలను పోగొట్టుకున్న భర్తలు మొత్తం కుటుంబాన్నే పోగొట్టుకొని అనాధలుగా మిగులుతున్న అభాగ్యులు ఎందరో.. 

ఈ నిరంతర ప్రమాద ప్రవాహం ఇలాగే కొనసాగితే కుటుంబ నియంత్రణ పథకాల అవసరం లేకుండా పోతుంది.. మనిషి మాన, ప్రాణానికి భద్రత లేని సమాజం మనది.. ప్రమాదాలకు భయపడి ఇంట్లోనే కూర్చోలేము.. ఈ ఉరుకుల పరుగుల సామాజిక జీవనంలో జీవన పోరాటం తప్పదు.. 

ప్రమాదం జరిగితే కర్మ సిద్ధాంతాన్ని వల్లించుకుంటూ విధిరాత అని సరిపెట్టుకుంటున్నారే తప్ప ప్రమాదాల నివారణకు తమ వంతు కృషి చేద్దాం అని ఎవరూ ముందుకు రావట్లేదు.. ఏదైనా ప్రమాద వార్త వింటే ఆ కాసేపు అయ్యోపాపం అంటారు.. తరువాత మళ్ళి మరిచిపోయి ఎవరి పనిలోకి వారు వెళ్ళిపోతారు.. 

ప్రమాదాలలో అయినవారిని పోగొట్టుకున్న వారుకూడా రోధించడమే తప్ప, స్పందించడం లేదు.. అన్నీ తెలిసిన విద్యావంతులు, యువకులు, పెద్దవారు కూడా వాహనాలలో ప్రయాణం చేసే సమయంలో తొందరపడి పోతుంటారు.. చిన్న చిన్న తప్పిదాలు చేసి ప్రాణాలు పోగొట్టుకుంటున్నారు .. సొంత వాహనమే కదా.. అని సరిగ్గా సమయానికి ముందు బయలుదేరడం, మార్గమధ్యంలో అనుకోని రీతిలో ట్రాఫిక్ రద్దీ వల్ల లేదా మరే ఇతర కారణం వల్ల ఆలస్యం అయిపోతుందని వేగంగా వెళ్ళడం ప్రమాదాలకు ముఖ్య కారణంగా మారుతోంది.. 

ప్రమాదాలను గురించి విని మాకు కాదులే అనుకోకండి.. మీవంతు రాకుండా చూసుకోండి.. 

దీని నివారణా మార్గం ఏ ఒక్కరి చేతుల్లోనో లేదు.. ప్రజలు, ప్రభుత్వం కలసికట్టుగా పనిచెయ్యాలి.. ప్రభుత్వం దీనికి ఒక సామాజిక సమస్యగా తీసుకొని క్రింది స్థాయి నుండి ప్రక్షాళన చెయ్యాలి.. ప్రజలు కూడా చైతన్య వంతులు కావాలి.. ప్రజా చైతన్యం లేనిదే ఏ సమస్యకు పరిష్కారం లేదని ప్రపంచ చరిత్రలే చెబుతున్నాయి.. అంతరిక్షానికే బాటలు వేసిన మనవ మేధస్సుకు ఈ సమస్య అసాధ్యం కాదు.. 

ఆలోచంచండి.. ఆచరిస్తే సుసాధ్యమే.. 

నా వల్ల ఏమౌతుందని ఎవరూ అనుకోవద్దు.. నావంతు కృషి చేస్తానని ప్రయత్నించండి.. 

నేను గ్రుడ్డి వాణ్ణి నా వల్ల ఏమౌతుందని ప్రాన్స్ దేశస్తుడైన లూయిస్ బ్రెయిలీ తలంచిఉంటే ఈ రోజు బెయిన్ లిపి ఉండేదా.. ప్రపంచంలో ఇంతమంది అందులకు మేలు జరిగేదా .. !!

వైధ్యం లేని జబ్బుగా గుండె జబ్బు వున్న తరుణంలో తన సోదరుడు హృద్రోగముతో మరణిస్తే నా వల్ల ఏమౌతుందని దక్షిణాఫ్రికా దేశస్తుడైన డా‍. క్రిష్టియన్ బర్నార్డ్ తలంచి ఉంటే నేడు జరుగుతున్న ఇంత సులువైన గుండె శస్త్చికిత్సలు, బైపాస్ సర్జరీలు జరిగేవా...!!

చెయ్యాలనే ఆలోచన ఉంటే ఆచరణ సాధ్యమే.. ఎక్కడికో వెళ్ళనవసరం లేదు.. మీ ఇంటి దగ్గర ఉన్నవారికే అవగాహన కలిగించండి.. రెప్ప పాటులో జరిగే అనర్ధాలను కళ్ళకు కట్టినట్లు వారికి వివరించండి.. ముఖ్యంగా యువతకు చెప్పండి.. ఒక కుటుంబంలోని వ్యక్తి అకాల మరణం చెందితే ఆ కుటుంబాన్ని ఎంతలా కృంగదీస్తుందో వారికి వివరించండి.. 

ఒక మంచి మాటకు ఒక కుటుంబాన్నేప్రాణంతో నిలబెట్టే శక్తి ఉందని మర్చిపోకండి.... 

స్వస్తి __/\__

Written by: Bobby Nani