తొలి స్పర్శ ..

తొలి స్పర్శ .. 

స్త్రీ, పురుషుల ఇరువురిలో “తొలి” అనేది చాలా ముఖ్యమైనది.. తొలిచూపు అయినా, తొలి వలపు అయినా, తొలి స్పర్శ అయినా... కాని నేటి యాంత్రిక జీవన విధానంలో, పాశ్చాత్య సంస్కృత ప్రభలిన నేటి సమాజంలో ఈ “తొలి” అనే దానికి మనలో ఎంతమంది ప్రాముఖ్యతను ఇస్తున్నారు.. ?? 

పెండ్లి ఒక్కటే తక్కువ .. మిగతా తంతులన్నీ ముందుగానే ఇరువురిలో జరిగిపోతున్నాయి.. ఇక నిజమైన స్పర్శ యొక్క మాధుర్యాని వీరు ఎలా రుచి చూస్తారు ?? ఆ ఆనందాన్ని ఎలా అనుభూతి చెందుతారు.. ??

స్నేహితులు కానివ్వండి, లేదా ఒకేదగ్గర పనిచేసే పెండ్లి కాని యువతీ, యువకులు కానివ్వండి, ఆకర్షణతో కూడిన ప్రేమ జంటలు కానివ్వండి.. ఒకరినొకరు పట్టుకోవడాలు, ఆలింగన, చుంబనాభిషేకములు వెనువెంటనే ఇద్దరిమధ్యా జరిగిపోతున్నాయి... భయం, భయంగా జరుపుకొనే ఈ విచ్చలవిడి స్పర్శా విన్యాసాల వల్ల నిజజీవితంలో నిజమైన మాధుర్యాన్ని నేటి యువత చవిచూడలేకపోతున్నారు అనేది అక్షర సత్యం ... దానివల్ల భవిష్యత్తులో వారి మధ్య “ప్రేమ” అనే బంధం బలహీనమై ఆలు, మగల జీవితంలో సర్దుకుపోయే మనస్తత్వాన్ని కలిగివుండటం, లేదా మరొకరితో రమించడం లాంటివి కలిగి వుండి, ఇరువురూ సమూలంగా దూరం అవ్వడంలాంటి పరిణామాలు సంభవిస్తున్నాయి .. 

ఇదిలావుండగా యువత అశ్లీల చిత్రాలకు బానిసలౌతూ నిజమైన శృంగారానికి కనుమరుగౌతున్నారు.. పవిత్రత కలిగిన భారతీయుత శృంగారాన్ని విశృంఖలత్వపు విచ్చలవిడి శృంగారమునకు అలవాటుపడేలా చేసింది ఈ పాశ్చాత్య సంస్కృతి.. 

చిన్న వయస్సులోనే తొందరపాటు నిర్ణయాల వల్ల వారి జీవితంలోని సంతోషాలనే కాకుండా పూర్తి జీవితాన్నే కోల్పోతున్నారు... 

“తొలి” అనే మాధుర్యం ఎలా ఉంటుందో చెప్పే చిరు ప్రయత్నంగా ఓ నూతన వధూవరులను ఉద్దేశించి రాస్తున్నాను.. ఎంతవరకు మిమ్ములను ఆనందింపజెయ్యగలనో చూడాలి.. 

అమ్మాయి చదువు పూర్తి చేసి ఉద్యోగ వెతుకులాటలో ఉండగా .. ఓ రోజు ఇంటినుంచి కబురు వస్తుంది.. ఉన్నపళంగా బయలుదేరి ఇంటికి రమ్మని.. 

హడావిడిగా ఇంటికి వచ్చిన ఆ అమ్మాయికి పిడుగులాంటి వార్త ..!! 

మరో వారంలో నీ పెండ్లి అని చెప్పి ... అబ్బాయి ఫోటో చేతిలో పెట్టి వెళ్తారు అత్తయ్యలు, పిన్నిలు .. 

ఆ ఆశ్చర్యంలో నుంచి తేరుకొని 

పెళ్ళా ... ?? 

ఎవరికీ ?? 

నాకే... 

అమ్మో భయమేస్తుంది... అని అనుకుంటూ ఆ ఫోటో పక్కన వున్న టేబుల్ మీద పెట్టి తన పాన్పుపై వొయ్యారాలు ఒలకబోస్తూ బోర్లా పడుకొని రెండు కాళ్ళను ముందుకు, వెనుకకు ఊపుతూ ఆలోచించసాగింది.. 

నేను ఇంకా సిద్దం కాలేదు .. 

అప్పుడే పెళ్లి అని అంటున్నారు.. 

సరే కనీసం ఓ నెల రోజులు అయినా ఉంటే బాగుంటుంది కదా.. 

మరీ వారం లో అంటే కొంచం కష్టంగానే ఉంది .. 

రేపు వారం ఈ సమయానికి నేను ఇలా, ఇక్కడ నా ఇంట్లో ఉండను కదా.. 

వేరేవాళ్ళ ఇంట్లో, కొత్త మనుషుల మధ్య ఉండాలి.. 

ఇంత స్వతంత్రంగా ఉండలేనేమో .. 

అమ్మో ఇవన్ని ఆలోచిస్తుంటే భయమేస్తుంది.. 

ఇప్పటివరకు అమ్మ, నాన్న మాటలే .. విన్నా, వినకపోయినా ఏమనేవారు కాదు.. 

రేపటినుంచి ఓ అబ్బాయి మాట వినాలి.. వారి తల్లి, తండ్రుల మాట వినాలి.. 

ఆ అబ్బాయితోనే ఉండాలి.. తన ప్రక్కనే పడుకోవాలి.. ఏంటో ఇవన్ని నేను చెయ్యగలనా,, ?? తలుచుకుంటేనే భయమేస్తుంది.. 

ఇంతకీ ఆ అబ్బాయి ఎవరు ?? ఎలా ఉంటాడు ?? 

చుసేస్తే పోలా.. 

అని అనుకుంటూ ఆ ఫోటో ని చేతిలోని తీసుకుంటుంది.. 

ఒడ్డు, పొడుగు చక్కగా వున్నాడు.. చేతులు కట్టుకొని శ్వేతవర్ణపు చొక్కా ధరించి చాలా హుందాగా కనపడుతున్నాడు.. చూపుల్లో ముక్కుసూటితనం, నిరాడంబరం, నిబద్దత కనపడుతోంది.. మొత్తానికి చాలా బాగున్నాడు.. 

కాని నాకు అర్ధం కాని విషయం ఏంటంటే .. 

నేను చాలా మంది అబ్బాయిలను చూస్తుంటాను కాని.. ఈ అబ్బాయిని చూస్తున్నప్పుడు ఏదో స్పందనలు కలుగుతున్నాయి.. బహుశా ఈ అబ్బాయిని పెండ్లి అనే దృష్టితో చూడటం చేత కాబోలు అని అనుకుంటూ... అయిబాబోయ్ అప్పుడే పెళ్లి ఆలోచనలు ఉక్కిరిబిక్కిరి చేస్తున్నాయి.. అని ఆ ఫొటోనే చూస్తూ నిద్రలోకి జారుకుంటుంది... 

ఎమ్మా అబ్బాయి బాగా నచ్చినట్లు వున్నాడే.. అని అంటూ ఆమె పిన్ని అడుగుతుంది.. 

ఆ మాటకు ఏం చెప్పాలో తెలియక నూగు సిగ్గులతో, కందిన బుగ్గలతో తల వంచుకొని వున్న ఆ అమ్మాయిని చూస్తూ యెంత ఇష్టం లేకుంటే మాత్రం అప్పుడే ఆ ఫోటోని తన గుండెలపై పెట్టుకొని నిద్రపోతుంది అంటూ పక్కన నుంచి ఆమె వరసైన అత్తయ్య ఆటపట్టిస్తుంది.. 

అత్త అన్న మాటలకు లో లోపలనుంచి వస్తున్న చిరు నవ్వులు బయటకు చూపించడం ఇష్టం లేక ఘల్లుఘల్లుమని అందియల చప్పుడుతో తన రూములోకి పరుగు పరుగున వెళ్లిపోతుంది.. 

పెళ్లి పనులు చక చకా జరుగుతున్నాయి.. 

ఒక్కటవ్వబోతున్న దంపతుల ఇరువురిలో ఒకటే ఆతురత.. భయం, బిడియం, ఆనందం అన్నీ వున్నాయి.. పైకి చెప్పుకోలేని వేల అనుభూతులు ఆవరించి వున్నాయి.. 

ఎవరికీ చెప్పుకోవాలి.. ?? 

ఎవరిని అడిగి తెలుసుకోవాలి ?? 

ఇలాంటి సమాధానం లేని ప్రశ్నలు ఇరువురిలో ఎన్నో ఎన్నెన్నో.. 

అనుకున్న సమయానికి అంగరంగవైభవంగా వారి కళ్యాణ వివాహ మహోత్సవం బంధు, మిత్ర పరివారముల మధ్యన శోభాయమానంగా జరిగింది.. 

అదే రోజు రాత్రి వారి జీవితములో జరిగే అతి ముఖ్యమైన మధుర ఘట్టం ఎదురైంది.. 

ఇరువురిలో కోర్కెలు సంగతి పక్కన పెడితే భయంతో రక్తనాళాలు పరుగులు పెడుతున్నాయి... 

ఏం చెయ్యాలి.. 

ఎలా చెయ్యాలి.. 

అసలు మొదలు ఎలా పెట్టాలి ?? అనే ఆలోచనలు ఊపిరాడనివ్వట్లేదు .. 

అత్తయ్యలు పిన్నిలు అందరూ తన అందాన్ని మరింత రెట్టింపు చేసి, ఒంటికి శ్వేతవర్ణపు వస్త్రం కట్టి, చేతిలోన పాల గ్లాసు పెట్టి, నాలుగు మంచి మాటలు చెవిలో చెప్పి సున్నితంగా తలుపు వరకు తీసుకెళ్ళి .. ఒక్క ఉదుటున తలుపు తీసి ఆమెను తోసి గొళ్ళెం పెట్టి నవ్వులు చిందిస్తూ వెళ్ళిపోయారు .. 

అక్కడ టెన్షన్ పడుతూ కూర్చున్న అబ్బాయి ఆమె రాకతో అతనిలో ఒత్తిడి తారాస్థాయికి చేరుకుంది.. 

కనురెప్పలు క్రిందకు వాల్చి, 

పారాణి అంటిన చేతుల్లో నలుగుతున్న పాలగ్లాసుతో, 

పదిహేను గజాలు పొడవు గల చీరలో పదహారణాల పడుచు తుమ్మెద నా ఎదుట నిలుచుందే అని కళ్ళు విట్టార్పకుండా అలానే నిస్తేజంగా చూస్తూ నిలబడిపోయాడు.. 

అబ్బాయే ... కాస్త చొరవ తీసుకొని సుకుమారపు స్వరంతో.. 

“మీ పాదాలు చాలా సున్నితమైనవి .. అవి అలా పుడమిని ముద్దాడుతుంటే నాకు చాలా అసూయగా వుంది. అందుకే ఇలా వచ్చి కూర్చోండి” అని అన్న ఆ వరుని మాటలకు .. మనసులో మురిసిపోతూ, అడుగులో అడుగు వేసుకుంటూ తనను దాటుకొని ముందుకు వచ్చి పాన్పుపై కూర్చుంటుంది. 

ఆమె వేసిన ప్రతీ అడుగుకు ఆమె అందాలు ఒక్కొక్కటిగా లయబద్దంగా కదులుతూ, ఆమె నడచిన గాలిలో కోటి సుగంధ పరిమళములు ఒక్కసారిగా వికసించినట్లుగా ఆ గది అంతా సువాసనలతో నిండిపోయి ఆ అబ్బాయికి మత్తెక్కిస్తోంది.. 

ఆ మైకం నుంచి బయటపడి తను కూడా వెళ్లి ఆ పాన్పుపై ఓ ప్రక్కగా కూర్చున్నాడు....

కంచమునిండా షడ్రుచుల ఫలహారాలు ఉండి .. తినలేనట్లు.. ఎదురుగా దేవకన్య లాంటి కోమలాంగిని పెట్టుకొని తను ఏమి మాట్లాడలేక అలానే తనను చూస్తూ ఉండిపోయాడు.. 

ఆ అమ్మాయి మాత్రం తన కళ్ళను క్రిందకే దించి ఆ అబ్బాయి పాదాలను చూస్తూ ఉండిపోయింది.. 

ఇరువురిలో చాలాసేపు మౌనం ఆవరించింది.. 

ఇతడేంటి నాకన్నా ఎక్కువ మొహమాటం పడుతున్నాడు .. ఇప్పుడెల .. నేనే మాట్లాడనా..అమ్మో వద్దులే .. అని ఆమె తన మనసులో అనుకుంటూ ఉండగా.. 

“నేను మీకన్నా చాలా మొహమాటస్తుడను అండి” అంటూ తన స్వరంతో ఉలిక్కిపడిన ఆమెను ... అయ్యో ఎందుకు అంత భయపడుతున్నారు ?? అంటూ తన హస్తములతో ఆమె వీపు వెనుక మృదువుగా, మెత్తగా తడుతూ వున్నాడు.. 

ఆమె ఆశ్చర్యంగా అలానే కొన్ని నిమిషాలు మౌనంగా వుండి పోయింది.. 

ఆ వరుని చేతి స్పర్శకు ఆమె నవ నాడులన్నీ ఒక్కసారిగా జివ్వు మంటూ గుండె వేగం పుంజుకొంది.. 

హృదయానికి రెక్కలు వచ్చి ఎగురుతున్నట్లు గా వుంది.. 

శరీరం గంతులేస్తుంది.. దేనికోసమో ఆ గెంతులు.. 

తన తాకిడి బాగున్ననూ .. కొంచం బెట్టుగా ఇప్పుడు పర్వాలేదండి అంటూ చాలా సన్నని స్వరంతో తియ్యగా తన రెండు పెదవులను వేరు చేసి అంటుంది.. 

ఆ మాటకు ఆ అబ్బాయి తన చేతులను ఆ అమ్మాయి ఒంటిపై నుంచి తీసి తన పక్కనే కూర్చుంటాడు.. 

దానితో ఆ అమ్మాయి కొంచం ఇబ్బంది పడుతున్నట్లుగా మెల్లగా జరుగుతుంది.. 

సరే మీ గురించి చెప్పండి అని ఆ అబ్బాయి ప్రశ్నిస్తాడు .. 

అన్నీ మీకు తెలుసు గా అంటూ సమాధానమిస్తుంది.. 

తెలుసు.. ఏం ? మీరు చెప్పకూడదా .. అంటాడు 

కూడదని కాదు .. కొంచం అలవాటవ్వాలి కదా .. అని తన పాదాల వైపే చూస్తూ అంటుంది.. 

అలా తల వంచుకునే ఉంటే ఎలా .. నన్ను చూడవ.. 

కనీసం ఫోటో అయినా చూసావా ?? అంటాడు.. 

ఊ... అంటూ సన్నని మూలుగు 

చాలా పొదుపైన వారే .. అంటూ చమత్కరిస్తాడు ..

అందుకామె ఏమి మాట్లాడకుండా తన చూపుడు వ్రేలుతో చెంపలపై పడుతున్న కేశాలను చెవి వెనక్కు సవరిస్తూ ఉండగా.. 

కదలకు అలానే ఉండు .. నీ సన్నజాజి పూలలో ఏదో తిరుగుతూ ఉంది అని అంటాడు.. 

అయ్యో ... అవునా అంటూ టక్కున లేచి తన చేతులతో పూలు తీయబోతుండగా .. మీరాగండి అంటూ 

ఆ అబ్బాయి తన వెనుకగా వచ్చి ఆ పూల కొప్పులో తన మునివేళ్ళును దూర్చి కదిలిస్తూ ఉండగా... ఆ కదలికలకు ఆ అమ్మాయి కళ్ళు రెండూ గట్టిగా మూసుకొని తన్మయత్వంతో ఉండిపోతుంది.. 

అంతటితో ఆగకుండా ఆ అబ్బాయి తనకు మరింత దగ్గరగా వచ్చి ఆ పూలను పరిశీలిస్తున్నాడు.. 

తన వెచ్చని శ్వాస ఆమె మెడపై తగులుతూ ఉండగా.. ఆమెలో శృంగార నాడులన్నీ ఒక్కొక్కటిగా మేల్కొంటూ తనలో నూతన కోర్కెలు పురివిప్పుతున్నాయి.. శరీరం అంతా పులకరించి భావోద్వేగాలతో రోమాలు నిక్కపోడుచుకున్నాయి.. 

సన్నజాజుల పరిమళానికి, 

ఆమె శరీర గంధపు సువాసనకు, 

గదిలోని సహజసిద్ద పూల సువాసనలకు ఆ అబ్బాయి కళ్ళు రెండూ మూసి ఆ అమ్మాయి భుజాలపై వాలిపోయాడు.. 

ఆ అబ్బాయి చెంపల గరుకుతనం ఆమె మెడపై మరింత భావోద్వేగాలను ప్రేరేపిస్తున్నాయి..

తన మనసేమో ప్రక్కకు వచ్చేయ్ అంటోంది.. తన చేతులేమో ఆ అబ్బాయి తల వరకు వెళ్లి అలానే ఉండిపోతున్నాయి.. ఏదో తెలియని పరవశం తనని చుట్టుకొని వుంది.. 

గుండె వేగం మరింత పెరిగి తన ఎద.. పైకి, కిందకు కదలడం చూసి ఆ అబ్బాయి తన తలను తీసి .. తన రెండూ చేతులతో నడుముపై చేతులు వెయ్యగానే.. గుండె ఝల్లు మన్న ఆ అమ్మాయి తనకు దూరంగా రెండు అడుగులు ముందు వెళ్లి అలానే నిల్చుంటుంది.. 

అందుకే చెప్పాను... ఏమన్నా మాట్లాడండి అని.. లేదంటే ఇలాంటివే జరిగిపోతాయ్.. ఇప్పటికైనా మాట్లాడండి అని అంటాడు ఆ అబ్బాయి.. 

తన శరీరం మాత్రం ఇంకా ఊపిరి తీసుకుంటున్నట్లు పైకి, కిందకు కదులుతూనే వుంది.. ఆ అమ్మాయి రెండు చేతులు తన మోకాలి పైభాగంలో వున్న చీరను గట్టిగా పిడికేలతో ఒడిసి పట్టుకొని వుంది.. 

దగ్గరకెళ్తే ఎగిసి కాని తన్నదు కదా అని అనుకుంటూ ముందుకు వెళ్తాడు ఆ అబ్బాయి...

తన దగ్గరకు వెళ్లి పిడికెలు బిగించిన తన చేతులను సుకుమారంగా పట్టుకుంటూ ఆమె చేతులపై ఇతడి చేతులను మృదువుగా రాస్తూ అలా పైకి భుజాలవరకు రాస్తుండగా.. తను ఒక్కసారిగా తన ఎదుట తిరిగి నిల్చుంది.. 

అప్పటికీ తలను కిందకే పెట్టి చూస్తూ వుంది.. 

ఇక ఇలా కాదని ఆ అబ్బాయి తన రెండు చేతులతో ఆమె మోమును దోసెట్లోకి తీసుకొని .. 

ఈ రోజునుంచి మనం వేరు వేరు కాదు ఒక్కటే.. మనసులు అయినా.. శరీరాలు అయినా.. 

శ్వాస అయినా, ప్రాణం అయినా.. 

నిన్ను బాగా చూసుకుంటానని చెప్పలేను కాని .. నీ కంటినీరు రాకుండా మాత్రం చూసుకుంటాను.. 

మొదటిసారి నిను చూసినప్పుడే నా ఊపిరి నీలోనే ఉందని ఆక్షణమే వదిలేసాను.. 

ఇకనైనా నన్ను నీ కనులతో చూడవా .. అంటూ తన తలను నిమురుతూ అడుగుతాడు.. 

కళ్ళనిండా నీరుతో ప్రాతః కాలమున మయూరము పురివిప్పినట్లు తన రెండు నేత్రములను తెరిచి చూస్తుంది.. 

ఎందుకు ఏడుస్తున్నావ్.. ఇప్పుడే కదా మాట ఇచ్చాను అని ఆ అబ్బాయి అనగా.. 

నేను ఎడుస్తున్నానా ?? బాగా చూడండి.. అంటూ తన ఎరుపు రంగు పెదవులు రెండూ చిన్నవిగా చేసి బుంగమూతి పెట్టి అడుగుతుంది.. 

వెంటనే తనని అమాంతం దగ్గరకు లాక్కొని కౌగిలింతలతో చుట్టేస్తాడు.. 

ఆమె కూడా తనని బిగుతైన కౌగిళ్ళలో చుట్టేస్తుంది.. 

ఆ రేయి అంతా వారిరువురూ బోలెడు కబుర్లుతో ఒకరినొకరు అర్ధం చేసుకొని మానసికంగా దగ్గరయ్యారు.. శారీరకంగా దగ్గరవడానికి కొన్ని రోజులు సమయం పట్టిననూ .. 

అలా వారి మొదటి రాత్రి మధుర రాత్రిగా మర్చిపోలేని రాత్రిగా గుర్తుండిపోయింది... 

ఇంత అందమైనటువంటి “తొలి” అనే అనుభవాన్ని నేటి యువతలో ఎంతమంది ఆస్వాదిస్తున్నారు... ??

ఈ ప్రశ్న మీ మనసుకు మీరు వేసుకుంటే పైన చెప్పిన శృంగార జీవితాన్ని రుచి చూస్తారు..లేదు కాదు అనుకుంటే ఇక మీ ఖర్మ.. చాటు మాటు శృంగారాలతో జీవితాన్ని చీకటిపాలు చేసుకుంటారు... 

చివరగా ఒక్క మాట : మీ సగభాగం ఎలా అయితే పవిత్రంగా ఉండాలని మీరు కోరుకుంటారో..వారికి కూడా మిమ్మల్ని అలానే అందివ్వండి... 

స్వస్తి ___/\___

Written by : Bobby Nani