“సంక్రాంతి”

“సంక్రాంతి” అంటే పండగ కాదు మన జీవనవిధానం .. అలాంటి పండుగ నేడు కనుమరుగైపోతుంది.. పల్లెటూళ్ళలో కూడా ఈ పండుగ ఛాయలు కాలగర్భంలో కలిసిపోయాయి. ఒకప్పుడు ఈ పండగకి సిటీలు బోసిపోతాయి, పల్లెటూళ్ళు ఫక్కున నవ్వుతాయి.. ఇప్పుడు రెండిటికీ పెద్ద తేడా లేదు.. పక్కున నవ్విన పల్లెటూళ్ళు వెల వెల బోతూ బిక్కమొహం వేసి మనవైపు జాలిగా చూస్తున్నాయి..అప్పటికీ, ఇప్పటికీ తేడా తెలిపే ఓ చిరు ప్రయత్నమే ఇది..

“సంక్రాంతి”

********

గంగిరెద్దుల వాని సన్నాయి మేళం 

జంగందేవర శంఖారావం 

సాతాని జియ్యరు శ్రీహరి గీతాలు 

నీకు తొలిజాము మేల్కొలుపు సంగీతాలు 

ఏవి ? ఇప్పుడేవి ??

ముద్దబంతుల ముద్దిడిన 

పైరగాలి సౌరభాలు 

చెంగు చెంగున దూకు 

లే దూడల పాల నురుగులు 

పొలిమేరల్లో నిన్ను స్వాగతించడానికి 

ఏవి ? ఇప్పుడేవి ??

సిగ్గు మొగ్గలు తొడుగ

సిగ చేమంతులే తురిమి 

రంగు రంగుల రంగ వల్లికలు తీర్చి 

మొగలి పూ..వంటి మగని కోరి 

మురిపెముగా గొబ్బెమ్మలే పేర్చి 

జడ కుచ్చుల చిఱు గంటల

చిరు గాజుల సరిగమల 

ముద్దు గుమ్మలు 

ఎదురు గుమ్మముందు 

నీకు స్వాగతము పలుకంగ 

ఏరి ? ఇప్పుడేరి ??

భోగి మంటల అరుణిమ 

నుదిటి సింధూరమై మెరయ 

అభ్యంగ నావిష్కృత కురులు పైకెగయ 

ముదమార ముడివేసి 

ముంజేతి గాజులు సయ్యాటలాడ 

ముత్యాల ముంగిట 

ముత్తయిదువుల ఆహ్వానములు 

అలలారు సమయములు 

ఏవి ? ఇప్పుడేవి ??

నవ దంపతుల సరసాలు 

విరి బోణుల విలాసాలు 

బా... మరదళ్ళ పరిహాసాల 

వదినా ..మరుదుల అనురాగాల 

చెంగలించు 

అలనాటి మా సీమలు 

ఏవి ? ఇప్పుడేవి ??

సింధూరపు బొట్టు 

పాపిట పెట్టి 

దొండ పండండి 

కొడుకు నిమ్మని 

కోరుకును సీమంత వధువులు ..

ప్రియుని పిలుపు 

శతకోటి వీణలు మీట, 

ఎదలో ప్రణయ రాగాలు 

సవరించు నవోఢలు 

ఏరి ? ఇప్పుడేరి ??

వోర వాకిలి వెనుక 

వాలు చూపులు సంధించు 

వన్నెలాడుల క్రీగంట పరికించి 

మధుర భావాల గుండె చప్పుళ్ళ 

పరవశించు కొత్త అల్లుళ్ళు ...

మూసిన ప్రణయ

సౌధపు వాకిళ్ళు తెరచి 

అలనాటి తొలిరేయి 

వలపు కౌగిళ్ళు తలచి 

పరవశించిపోయే 

ముదుసలి యెవ్వన మామలు..! 

అనురాగపు జల్లుల తడిసి 

మగని పులకరింతకు జడిసి 

లోలోన మురిసిపోయి 

ముసిముసిన నవ్వుకునే ముదుసలి అత్తలు..!

ఏరి ? ఇప్పుడేరి ??

కోడి పందాలు, 

కోడెల బలాబలాలు 

గంగిరెద్దుల నాట్యాలు 

కోలాటముల సయ్యాటలు 

భగ భగల భోగి పాయసము

పొంగారు పొంగలి 

ౘవులూరు గుత్తి వంకాయ 

కమ్మని గుమ్మడి పులుసు 

రోటిలోని వేడి వేడి గోంగూర పచ్చడి 

జిడ్డు తేలిన 

గడ్డ మీగడ పెరుగు 

ఏవి ? ఇప్పుడెక్కడివి ??

కనుమరుగై, కాలగర్భమున 

కలసిన అలనాటి మన పద్దతుల 

సజీవ దాఖలాలు

ఏవి ? ఇప్పుడేవి ??

కాలం మిగిల్చిన మన కన్నీటి ఆనవాళ్ళు 

గతకాలపు స్మృతి చిహ్నాలివి 

కాంతి లేని పల్లెటూళ్ళు ..! 

ప్రాణం లేని లోగిళ్ళు.. !

వెల వెల పోతున్న పండుగలు.. 

సంకెళ్ళ మాటున “సంక్రాంతి” చీకట్లు.. 

దుర్భర దారిద్ర్యపు కౌగిల్లు ...దుస్సల దైన్యానికి సజీవ నకల్లు..!!

పొట్టతిప్పల వేటలో యువకులు.. 

పూటగడవని వృద్దులు ..

వయసుడిగిన కాలంలో ..

పాతబడిన ఇళ్ళకు కాపలా..

ఇదీ ముసలితనపు చిత్రం ..

రాలుతున్న బ్రతుకు పత్రం.. 

కళ తప్పిన “సంక్రాంతి” నూతన భాగోతం ..

ఇది ఏ అభివృద్దికి చిహ్నం ?? 

ఏ సంక్షేమానికి సూత్రం .. 

ఏ విపరీత పోకడకు విచిత్రం .. 

Written by : Bobby Nani