ఒక ప్రేమికుడు అడిగిన కోరిక.. తన ఆవేదనను అక్షరాలుగా మలచమని.. !!

ఒక ప్రేమికుడు అడిగిన కోరిక.. తన ఆవేదనను అక్షరాలుగా మలచమని.. !!

దూరంగా ఉంటే దూరమైపోతావనుకున్నవా 

నీ పిచ్చి గాని.. 

కరిగే కాలమూ, 

కదిలే కెరటాలు 

ఎవరికోసమూ ఆగవు.. 

అవిశ్రాంతంగా ముందుకు 

పయనిస్తూనే ఉంటాయి.. !!

అలానే నీపై నాప్రేమ 

విశ్రమించని ఎదురు చూపులే... 

వికసించని కుసుమ పరిమళములే... 

కన్నీరింకని నయన జలపాతములే.. !!

ఓ ప్రాణ సఖీ.. !!

నా ప్రస్థాన త్రయ పాండిత్యం 

నీ గంభీరనతనాభి లోయలో కూలిపోయినది.. 

నా సకల శాస్త్ర విజ్ఞాన సర్వస్వం 

నీ శిరోజ నీలి శిఖరాలముందు వెలవెలబోయింది.. 

దిక్కుతెలియని దిగంబరుడనై చిక్కుకున్నా

ద్వి శరీరాలింగనైక శ్రీ కారాకారాదిమ బంధంలో..

అవర్ణనీయమై పోయాయే నా వర్ణనలన్నీ.. 

నీ అదృశ్యముతో.. !!

ఓ ప్రాణ సఖీ.. 

నా ఆశాకాశ పూర్ణచంద్రముఖీ..

ఎన్నో అభివర్ణించిన వాచస్పతిని 

నేడు మన దూరాన్ని వివరించలేక పోతున్నా.. 

ఎన్నోన్నో అనుభవించిన కళామతిని.. 

నిన్ను అభినయించలేకపోతున్నా.. 

శ్రీకార శిఖరాల మీద 

నా ఆత్మానుభూతిని ఎగరవేయడానికి 

నేనే ఓ బావుటాన్నై..నీ సరళవక్ర 

రేఖాగణిత గుణిత జనిత 

అగణిత రూపాలను 

అవగాహన చేసుకుంటున్నాను.. 

కాలాన్ని నా కన్నులలో మోడ్చి 

అనంతాకాశం వైపు శిరస్సెత్తి ఎదురుచూస్తున్నాను...

లిప్తపాటులోనైనా నీ రూపం దరసించుననే విశ్వాసముతో..!!

Written by : Bobby.Nani