ఏముంది?
ఈ ప్రకృతిలో ఆస్వాదించడానికి
మరేముంది
ఈ సృష్టిలో అవలోకించడానికంటూ
కళ్ళు తప్ప హృదయంలేని,
ముక్కు తప్ప జీవాత్మ లేని,
అమాయక ప్రాణులం మనం..!!
అదృశ్య సౌందర్యాల్ని అస్పృశ్యముగా అన్వేషిస్తూ
అతిమనోహర భంగిమల్లో సుందరంగా కదుల్తున్న
ఆ కొమ్మ కొమ్మ లోని అంతరంగాన్ని చూడు
రంగురంగుల ఆకులలో అంతులేని స్వర్గాలు
లిప్తపాటు కనురెప్పల కదలికల్లో
ఆవిష్కరించబడుతున్న అద్బుత సూర్య, చంద్రోదయాలు
విచ్చుకుంటున్న ప్రతీ పువ్వూ
అనంత సువాసనల్ని ఘుళిపించే సుమధుర ఘట్టాలు..!!
ఉషస్సును పారబోసుకుంటూ
కృత్రిమ కలల్లో .. ఎందుకని వెతుక్కుంటావ్
రా..!!
ఆ శీతల గదుల మధ్య నుంచి
ఉషస్సులో కరిగిపోతున్న ప్రవాహాన్ని చూడ్డానికి
హృదయాన్ని దోసిలి చేసుకొని తనివితీరా ఆస్వాదించడానికి.. !!
No comments:
Post a Comment