నువ్వొచ్చాకే ఈ నేల మీద నా అస్తిత్వం స్థిరపడింది ...

నీ గురించే ఆలోచిస్తున్నాను... 

కళ్ళజోడు పెట్టుకున్నా కానీ 

ఏ స్వాప్నిక ప్రపంచమూ కనిపించని నా 

జీవితంలోకి వెన్నెల తోరణం లా 

ప్రవేశించిన నీ గురించే .. 

పగలూ, రేయీ ఆలోచిస్తున్నాను.. !

నీపై ఎన్నో ఊహలు చేసాను.. !!

నువ్వు మొదటిసారి నాకు తారసపడ్డప్పుడు 

నీనుంచి రెండే రెండు పొడి పొడి మాటలు రాలినా 

మాట్లాడినంత సేపూ నీ రెండు కళ్ళూ నా 

హృదయంలో అమర్చిపోయావు.. !!

మంత్రించి విడిచిన మహావాక్యంలా 

నువ్వొచ్చి చేరావు నా ప్రతీ కావ్యం లోకి.. 

నేనొక కలనో, కవితనో అల్లుకుంటున్నప్పుడు 

విడిపోతున్న దృశ్యాక్షరాల మధ్య 

ప్రప్రధమ ఆకాశపుష్పంలా, 

ఘుమఘుమలాడిపోయావు.. 

ఎవరూ చూడకుండా నీకోసం 

ఎన్ని సముద్రాలు దాటి వచ్చేవాణ్నో ..

ఎవరికి చెప్పి నమ్మించను..??

వికృతాకారాల విషదంష్ట్ర లు నా

రక్తమాంసాల్ని చీల్చలేదని కాదు.. 

విశాల వక్షోజాల మధ్య కొరికితే 

స్వర్గంగా విహరించలేదనీ కాదు 

విశ్వ సంకుచితత్వాన్ని అధిగమించాలనే 

ప్రయత్నం మాత్రమే నీలోని ఆకాశాల్ని నాకు 

సన్నిహితం చేసింది.. 

మరేమీ లేదు, 

నువ్వొచ్చాకే ఈ నేల మీద 

నా అస్తిత్వం స్థిరపడింది 

ఆకాశంలో నక్షత్ర కూటమి 

నిశిరాత్రి చెవిలో రహస్యంగా 

గుసగుసలాడింది.. !!

Written by : Bobby Nani